Hongtin Tsok-gia̍p bāng

一个人跳舞是造反，一群人跳舞是民意。

這禮拜二暗時知影一件使人足心酸的代誌，

政府竟然私底下佇三秒鐘內著通過「兩岸服務貿易協議」，

遮爾仔重要的代誌，竟然無經過全國人民的同意，

這種政府實在是有夠袂見笑、有夠使人生氣。

拜三我佮朋友著決定欲做伙去立法院靜坐，

去到遐已經下晡一點了，

彼時陣立法院外口已經有差不多一千偌人，

逐家攏坐佇塗跤，喙攏咧喝：「退回服貿，捍衛民主。」，

我著佮逐家鬥陣喝，雖然日頭一直曝，喙喝甲梢聲，

猶毋過彼款逐家做伙為全台灣未來努力的感覺，予人足感動矣！

拜四暗時我佮另外一寡朋友做伙去立法院，

暗時一點出發的車，四點才到台北，

早起時仔拄好警察欲換班，我佮逐家做伙圍警查，

驚警察偷偷旋入去立法院，按呢會予內底的人有閣較濟的危險，

警察其實嘛足配合，猶毋過現場人濟，有淡薄仔亂。

這兩擺去立法院的靜坐，攏予我有無仝款的感覺，

是愈來愈多人知影、關心這件代誌，

逐家有錢的出錢，有力的出力，

看著的是人情，無是新聞媒體報導的「暴民」，

每一个人攏是為著台灣咧打拼，

我嘛佮家己講：「袂使放棄，這是家己的未來，愛家己爭取。」