Hongtin Tsok-gia̍p bāng

佇咧怹兩人討論了後，著決定共家己e5父母講這件代誌，以芳一直是這段感情e5上位，進前伊答應士濱e5求婚，但是伊擱無想欲縛佇彼个箍仔內底，只好先佮士濱講好怹先訂婚，毋過互相父母見面e5代誌著等甲怹確定欲結婚e5時，才來講。擱按怎講怹兩人e5父母攏行佇感情e5雙叉路口，做人序細e5總是愛卡體諒咧。伊家己是好解決，父母雖然離緣，毋過感情並無拍歹，伊煩惱e5是士濱，毋知伊是欲按怎予怹父母做伙出席。

「母阿！我已經佮以芳決定欲結婚矣！是毋是會當請你佮爸做伙來去佮以芳怹父母食一頓飯，討論阮e5婚事咧？」

士濱若問若驚惶，紲看著怹母阿歡喜e5行去電話邊仔，電話夯咧著欲講話。「正宏，聽我講！咱囝欲娶某阿啦，你緊揣一e5時間咱來去以芳怹兜拜訪！」

士濱本來心想講，自從阿母kap阿爸離婚了後著攏毋捌看伊兩人有啥物kau tshap ，今嘛in 兩人e5互動紲這呢好，恐驚怹兩人一定有私下連絡。

「阿姨阿叔，這兩位是我的父母……」當士濱欲介紹伊家己e5父母時，張正宏著伸手出來講：「吳經哩！你好，我叫張正宏，佇較早著有見過面了，原來你著是以芳的爸爸，無怪我看以芳攏有一種熟識的感覺，啊這位應該著是以芳e5媽媽，毋知欲按怎稱呼？」

「我叫黃玉卿，逐家攏無差幾歲，叫名著好較袂生份，以後攏欲做親家矣！」

        看見男方的家長遮呢熱情，吳瑞濱嘛歡喜e5講：「我叫吳瑞濱，kap張董捌做伙開會過，阿閣毋捌看過未來e5親姆，請問親姆欲按怎稱呼咧？」

「我叫陳愛芳，感謝lin2肯把寶貝查某囝交予阮士濱……」愛芳一夯頭，看見目前這個人，紲袂當講話，兩粒目睭ténn甲大大蕊。

「是你？愛芳甘真正是你？」