close
這禮拜日，我佮厝內的人做伙提早去拜清明，嘛有真濟人佮阮有仝款的想法，提早去拜清明才袂人傷濟，共攢好的物件佮水果佮金紙囥佇拜拜的桌仔頂，阮開始燒香拜拜，阮先拜地藏王菩薩，然後拜祖先佮土地公，清明節拜祖先，是共咱做囡孫的人講愛會記「食果子拜樹頭」，人愛「飲水思源知本懷恩」，清明節是真特別的民俗文化，是重視孝道的傳統倫理文化。
會記細漢時，爸母無欲予我去墓仔埔的所在拜祖先，有可能是因為我傷細漢，感覺予囡仔去遐無啥好，會記以前看阿爸無佇厝去拜拜，我就共阿母吵，吵講我想欲去，阿母當袂牢我的吵鬧，就載我去墓地的門口，叫我看一下就來轉，細漢時毋知父母的想法，這馬想想咧，講實在予傷細漢的囡仔去遐確實無蓋好，這馬大漢每一年攏會使佮厝內人做伙去拜祖先，「食果子拜樹頭」這確實是咱每一个人應該有感恩的行為，感謝祖先為囡孫的拍拼，予我這馬會使佇這个時代生活，有飯食、有衫穿、有厝通遮風避雨，雖然是小小的一間厝，但是煞是真溫暖的。
全站熱搜
留言列表
