Hongtin Tsok-gia̍p bāng

　　　　這禮拜五，我和我ê男朋友同齊去看一齣眾人推薦ê好片－「總鋪師」。看了後，心中有誠濟感想。

一、佇遮，我著大概講一下á劇情內容：

一个總鋪師ê查某囝，佇伊ê老爸過身了後，完全無想欲繼承in老爸ê手路，致使誠濟古早味ê手路菜攏失去了了。後來，伊為tio̍h還數kap替一對老翁某重辦婚禮紲答應參加全國煮食比賽。佇咧準備ê過程中，伊才體會著頂一代拍拚煮食ê苦心。雖然落尾in無提著冠軍，猶毋過，伊得著上蓋貴重ê「古早心」。

二、我ê感想：

    「辦桌」是咱台灣人共同ê記持，無論是七、八十歲ê老大人，猶是四五歲ê小朋友，一定攏bat食過辦桌。佇這齣電影內底，有誠濟笑詼ê動作、歌曲kah言語，共逐家弄kah笑咍咍。

    毋過，我看著ê是閣較深ê內容，是一个查某囝覺醒著老爸是按怎對煮食ê堅持；是一个佇恁身軀邊一定攏看會著ê樂觀查某人；是一个行過人生大風大湧ê總鋪師做出最後一lōo菜ê飄撇；是一个欲揣出屬於逐个媽媽煮食ê氣味ê料理醫生；是一个甘願覕佇火車磅空內煮食ê戇人總舖師。當然，猶閣有誠濟袂當欠ê趣味角色、辛苦ê工作人員……等等，才會當拍出一齣眾人呵咾ê好片!