Hongtin Tsok-gia̍p bāng

    因為我欲去參加大甲媽ê繞境活動全程，會袂赴交第四篇學習週記，所以我寫代先。

    3/27佇台北立法院

    三月二十七日，我和同學又閣上台北立法院--ah，這擺是系上負責tsih-tsiap的，會當參與著這種歷史會記落來的大代誌，感覺誠榮幸。彼工，日頭赤焱焱，猶毋過逐家攏是團結的，和俗語講的「隨人顧性命」無仝！阮到台北了後，坐佇議場外口、圍牆內底的所在，恬靜咧聽外口演講台的人講話，有幾偌位彼工佇咧行政院予警察扛出來的人上台發表感想；嘛有來自各行各業的社會人士發表伊的看法。佇遐，我學著課堂內學袂著的物件，是一堂無khik-khui的公民課。

    佇咧靜作的過程中，有一件代誌是我較袂當接受的：

    Tsiah-nī-á嚴肅的議題，竟然誠濟人當作咧參觀！已經失去抗議的本質--loh。阮主任講了對，若是傷過和平，逐家就會感覺內底的人已經無需要支援—ah！阮毋是暴民，毋過，面對政府就是愛予in「有感覺」，啥物是「有感覺」?就是「無方便」，佔立法院敢真正會造成困擾？其實若真正欲硬拄硬，會當共會議suá去別位開，同款會當進行；不爾過，若是佔公共運輸系統，親像主任講的伊佇外國看著的罷工抗爭是直接佇車頭逐家坐落來，按呢是毋是就會造成「無方便」呢!

    理性思考這項代誌，憑啥物用三十秒就會當決定咱台灣人民的未來？足濟人講學生毋好好阿讀冊，無代無誌來遮浪費全民的稅金，毋閣，今仔日若無徛出來，huān-sè有一工咱連講話的自由攏失去--ah! 

    3/30號，全民勇敢徛出來！