拄到一個生分ê環境，我無法度一下仔著融入，必須愛有一段ê適應期，所以我攏會惦惦佇邊仔看。實習ê第一工，領班大約說明了後，著予我有親身加油ê機會。當領班共我講：「瓊慧，等一下oo-tóo-bài來著予汝加。」ê時陣，我心內大聲喊講：「啥乜？Hiah緊喔，我攏抑未準備好leh……」毋擱，我袂當說-毋，只好佮伊拼。無偌久著來一台oo-tóo-bài，我非常緊張ê去替彼位人客加油，這個時陣，領班著佇邊仔共我指導，總算是安全通過。漸漸仔，我越來越熟手，「歡迎光臨，汝好，請問汝欲加啥乜油」，我mā大聲tuè人喊！
佇我實習第三工欲下班時，領班真tah-sim共我鼓勵：「免傷緊張，雖然明仔載是會員日，毋擱，照汝這幾工平常ê表現去做著好，汝一定無問題啦。」雖然只是簡單幾句話，但是，我ê心情確實有較輕鬆，我一定愛好好á做，才袂辜負領班hiah用心ê共我教。
目一nih，會員日到á，我一去到加油站，皮著繃tsiann緊，其他ê同事看tsiann緊張，攏過來共我『加油』，我mā佇心內共家己鼓勵：「我一定做會到，過了今仔日這個大考驗，我以後著無免驚囉！」
拄交班，車輛抑koh毋kài濟，毋擱，下班一到，車著一台接一台進來，koh愛排隊leh，我是從來毋捌看過加油koh愛排隊。敢講我攏袂緊張？大家錯了，彼是因為我已經無閒ka毋知通緊張。過了真久ê時間，我總算會當歇睏，也著是食飯ê時間。同事真好心予我著個菜鳥第一個去食飯兼歇睏，領班koh共我交代講：「食飯時間大約是十五分鐘喔。」啥？我拄kiò-sì講我會當好好á歇睏一下，毋想到若軍營leh，一食飽著su愛去做工課，實在是有夠忝。佇leh上班ê這段時間，除了食飯以外，我完全無歇睏著，一直加油一直加油，雄雄領班共我講：「瓊慧，汝毋是做到十點，會當下班á。」
啥？我再一次佇心內問我家己：「已經十點á喔？naih hiah緊？」
領班看我定定毋動靜，著共我喊講：「Koh毋入來結數。」
對honn，我是背島ê人，愛去算看我有了錢--無？真無簡單拄度過這個無閒ê上班日，想袂到koh有另外一個考驗sui leh 等我。帶著不安ê心情tuè領班入去辦公室，經過久長ê結數時間(對我來講)，結果總算出來囉－非常好，無了錢喔！
領班帶著笑容共我講：「瓊慧，無簡單neh真，gâu喔！」
「無啦，毋是我厲害，是領班教了好，而且mā愛多謝其他ê同事共我鬥相工。」轉到住ê所在了後，雖然足忝，毋擱，我趕緊將今仔日ê過程講予阿母聽。 結束了我佮阿母ê通話，我總算是會當歇睏á。
留言列表
