尤勝翔：「哈哈，講起--來我嘛是一个查埔囡仔，按呢仆佇你个胸坎，若予人看著咱二个真正著雞喙變鴨喙。你毋是講有買中晝頓欲予我食？你是買啥？」
姚志凱：「當然嘛是你上愛食个咖啡佮雞卵糕！緊食啦！你下晡毋是閣愛上鋼琴？」
尤勝翔：「你若會知影我下晡愛上鋼琴，我昨暝誠接著通知，你是毋是閣偷聽我講電話？你緊講予清楚，若無我絕對無愛放你煞！」
當怹二个塊觸嘴鼓个時，沈世平佮林志廷做伙行過來。
沈世平：「果然不出我所料，志廷我著共你講怹二个一定佇遮約會。我看恁二个抑是緊公開，通仔予恁个追求者死心啦。」個性真愛講耍笑个世平，又閣予逐家笑哈哈。
林志廷：「著矣！聖誕節嘛欲到矣，我看今年恁收个禮物閣有通拚矣！抑是今年咱閣來比賽，看啥人个禮物總金額是上懸个。」
姚志凱：「好矣！無塊驚啦，若輸个人愛請逐家食聖誕大餐！」
沈世平：「我攏會使啦！但是我感覺有澹脯仔無公平，因為勝翔逐年攏閣有查埔个愛慕者，按呢咱真食虧！」
尤勝翔：「喂喂喂！恁欲比賽我是無意見，但是勿烏白牽拖，明明是家己實力䆀，袂曉駛船嫌溪狹！好啦，我愛先去上副修矣，再會！」
沈世平：「好啦，按呢嘛欲去上課矣，今旦日是我个主修烏笛仔，我愛緊來去，下課誠做伙來食飯ooh！」怹
四个查埔囡仔，逐工攏差不多攏按呢生活，亦因為怹稅厝攏稅做伙，所以做任何个代誌亦攏和齊鬥陣，怹个感情比兄弟仔閣較好。
時間亦過得誠緊，又閣到鳳凰花開个時，怹必須愛準備畢業音樂會，所以怹亦決定，怹四个欲做伙來開音樂會。
尤勝翔：「凱，音樂會欲到矣，講實在我誠緊張，因為我今旦日有聽著老師怹塊討論咱這場音樂會。」
姚志凱：「無啥乜好驚啦！表演無好袂予人安怎啦！」這个時陣世平真慌狂走--來。
沈世平：「逐家緊來看，我拄遮去老師辦公室，看著講：『咱音樂會彼工，維也納音樂學院个教授个來咱學校揀學生，所以咱愛phah拚，看會使咱做伙予揀去。』」
林志廷：「莫怪學校硬欲叫咱彼工開音樂會！」
姚志凱：「按呢咱真正愛做伙phah拚，為著欲做伙出國讀冊！」
著佇一個月了後，總算到音樂會个時陣。
主持人：「各位貴賓逐家暗安逐家好，等一咧節目開始進前，有幾个事項請逐家愛遵守。第一，請逐家个手機仔抑是呼叫器一定愛關機抑是調成震動；第二，請逐家佇節目進行中間，毋通隨意離開位置，抑是扑噗仔。節目連鞭開始，請逐家聽候，感謝逐家个配合。」
尤勝翔：「真正欲開始矣，凱，咱二个是頭一个節目，我真正足緊張，我咁會失誤......」勝翔已經緊張甲亂講話矣。
姚志凱：「翔，你愛相信我矣，咱平常時毋是攏真順，勿袂記我昨暝共你講个話。」
講嘛塊怪奇兼三八，佇姚志凱講煞了後，尤勝翔又閣恢復伊自信个笑容。
主持人：「咱第一个節目著是由咱个勝翔帶來个聲樂獨唱，伴奏是志凱。」
今旦日个勝翔嘛毋知是安怎，若像變一个人，表現特別出色，予逐家真呵咾。續落來志凱个鋼琴獨奏、世平个烏笛仔獨奏、志廷个小提琴獨奏，攏得著真懸个評價。
上尾仔，最後一个節目是怹做伙表演，這个曲是怹做伙完成--个，所以佇充滿感情个音樂當中，音樂會亦成功結束--矣。
沈世平：「恁緊來看啦！咱四个做伙錄取維也納音樂學院矣！」
林志廷：「應該是料想會到个啦，咱昨暝表現了遮爾出色。但是翔你昨暝唱了特別好，你是受著啥乜鼓勵？」 志凱佮勝翔對看，雄雄笑--一下
尤勝翔：「無安怎矣，應該是聲較開个關係啦。」
林志廷：「既然你無愛講，按呢我嘛無愛問矣！隨在你啦！」個性一向較凊彩个志廷嘛無愛閣問矣。
佇怹討論了後，怹決定欲做伙出國讀冊，一方面是為著欲接受較好个音樂教育，逐家做伙去讀嘛有伴；另外一方面，怹想欲家己過生活，無愛閣予父母控制矣！
所以佇怹畢業典禮煞了後，怹著準備欲做伙出國矣。
留言列表
