"恁勿烏白講,我啥物時陣做過這款代誌。"我提出抗議。
"是--喔?若按呢這是啥物"雲在一爿講一爿提出一本簿仔,志峰甲頭tū過去看。
"啥物!真希望毋是按呢!"志峰一爿看一爿唸
"下晡四點半,送小梅的小妹去補習,而且已經連續了2個月!"
"我的記事簿仔,你啥物時陣提--去的?"我發見著彼本簿仔竟然是我的記事簿仔,大聲喝--起來。
"閣有--咧!"雲在共簿仔掀到另外一頁,志峰閣唸落--去。
"啥!"志峰的面干單是看著鬼仔的表情。
"拜三暗時八點載小琪的彰化朋友去坐車。"
志峰衝到我的面頭前共我掠牢講"袂是昨暗時咱踅夜市仔的時陣,拄著佮小琪行作夥,身懸百八,身重看--起--來超過一百,倒手提鰇魚,正手提雞腿,你一開始閣共伊當作查甫,結果小琪才講彼是伊對彰化來的朋友,是怹大學柔道查某組的主將,外號黑熊的彼个--吧!"
雖然真無願意,抑毋過白紙黑字寫甲真明,我嘛只好點頭承認。
"你是毋是頭殼破去--矣?"志峰咻講"你著算講無爲你家己設想,嘛愛為你的機車設想,我敢保證,載了彼隻黑熊了後,你機車的歲壽至少減--去三年。"
"我嘛無願意--啊!抑毋過小琪講伊干單會使拜託--我--啊!身為查甫人我哪會使拒絕--伊"我講出我的理由。
"癮頭的,彼是因為干單你會答應這款代誌,只有你會當拜託--啊!你嘛拜託一--下。"這時陣志峰的手機仔響--起--來,志峰看一--下講"我欲去拍球--啊!"行過我的身邊,志峰共手囥佇我的肩胛頭對我講。
"你創啥物,做兄弟的一定攏tīn你,但是這擺,唉......"志峰吐一口大氣,穿了鞋仔離開寢室。
"無要緊,伊不tshap你,我tīn你--啦!"雲在行到我邊仔共一張細張的紙囥佇我的手,我提起來看,面頂干單兩個字,"好人"。
我tshinn了雲在一nih。
"幹!"
我共囥了三天猶未洗的臭襪子對雲在的喙tsīnn過。
留言列表
