close
春假煞了後，阮全班欲去逐媽祖，透早就爬起來，所以我上車無外久就睏去矣！阮敢若是佇雲林落車，反正綴人行就著啦！信徒攏真熱情，一路上有足濟物件通食，免驚會枵著。行煞轉到厝已經真暗矣，隔轉工閣愛足早起來，想著就感覺真忝。一工的逐媽祖體驗，真濟人的腳攏會痠痛，毋過我完全無代誌，我想可能是我的腳的肉比阮班彼陣美女較濟的款，第一擺感覺腳雖然大支毋過嘛有好處。
客語老師知影阮拜一轉來足忝的，所以伊拜二早起無上課，伊予阮看一齣客語電影「春天愛唱歌」，真好看，使人真感動，親像我遐爾愛哭的人，衛生紙一定用足濟張，毋過我驚予人看著，所以我用手ńg拭，手ńg有一大片攏澹去。電影內面有一幕予我印象足深：「春天因為誤會伊的爸爸佮伊的老師有曖昧，所以對爸爸的態度無蓋好。有一工伊的爸爸足暗閣猶未轉去厝內，結果老師來揣伊，講伊的爸爸受傷去病院，彼時陣伊才知影爸爸有外重要。」咱平常時就愛珍惜家己所有的物件，毋通失去了後才咧後悔。
拜三我去圖書館納錢，因為我袂記得還冊，所以愛罰五摳。拜二的時陣，桂園伊講伊冊無還愛罰錢，我笑伊攏無咧注意時間，結果我家己嘛仝款，真正是「龜笑鱉無尾，鱉笑龜粗皮」矣！
這馬台語檢定已經會當開始報名矣！我佮瑛娟、詩晴、文慧、桂園、淑欣攏想欲試看覓，若是幸運考過就好矣，考試佇八月，閣有時間通準備，加油！
全站熱搜
留言列表
