Hongtin Tsok-gia̍p bāng

今仔日我想欲和逐家分享的是大甲媽出巡，相信有真濟同學攏有綴著媽祖的跤步，一路對大甲行到新港，閣對新港轉大甲，九工八暝，總共三百外公里，有影是一條真艱難的路途。

自底我是想欲佮媽祖結緣，來一个人神共途的旅程，可惜我臨時有代誌，袂當和媽祖婆鬥陣行行煞全程，毋過，我上無猶有行六工。六工，講長袂長，講短袂短，算是較拄好的行程，尤其是對我這个頭一擺行遐濟工的初心者來講，嘛算是有夠我食苦矣！

一開始，我真緊張嘛真歡喜，行前做了真周全的準備，有捒車仔、葵笠仔、草蓆仔、雨傘、雨幔、淺拖仔、布鞋、醫藥用品、糞埽袋仔、內衫褲、kha-báng-仔之類--的，反正就是共日常用品窮予齊就是矣，險險共厝內的物件抔抔空空，袂輸著賊偷咧。

頭一日聽講是上辛苦的一工，對無經驗的人來講，確實是真食力。偏偏我這个人是真固執，無共信篤，心頭想講敢有遐譀？有經驗的人攏鐵喙斷定彼日是全程關鍵，若是忍會過，後面的路途就無算啥，我親自行過了後，我相信矣！佇遮嘛苦勸有欲行大甲媽的人客，請愛有心理準備。

這六工內，有風有雨，有情有伴，是一个真特殊的旅遊。印象中上有感觸是起駕了後的第一暝，彼暝我永遠就無法度放袂記得，因為彼是我人生所有旅行當中上落魄的一擺。四界暗摸摸，雨神摔大雨，風神起大風，我的跤步袂輸狗蟻的一步，行了真艱苦，這時我才發現原來我這馬的一細步是平常時的一大步。

這幾工我有幾偌擺想欲放棄，心頭不時責備家己創啥食飽傷閒踮遮食苦？佇厝曲跤撚喙鬚毋是較贏佇遐受盡風霜？相信佮我仝款的「旅人」濟少攏有這款感想。但是佇過程當中，我看見有人跤步一跛一跛、有滿頭白鬃，手提大欉香的信徒、曲痀的阿媽、幼韌的細漢囡仔，in現在攏佮我仝款，佇仝款的環境當中，in佮我無仝的是in的堅定信念，可能是因為看著百樣的「媽祖情」，予我堅持行落去。

每一擺的歇睏是我感覺上幸福的時陣，無暝無日的趕路，日夜顛倒的日子，有影予我的生理時鐘產生大變化，日時無力行路，暝時睏袂落眠，誠是忝頭。毋過，時間會帶過一切，無幾日就漸漸適應矣。嘛愛感謝沿路的「二十四點鐘」佮「M阿叔」的存在。

若是講著食，路途不時會出現免錢的食物予香客，提供食物的人誠是菩薩心肝，添飽真濟人的腹肚，免受枵肚的苦楚。因為我的行程主要是到新港，這段時間是食菜，所以這幾日我算是食較養身，雖然我吞四粒菜粽和兩片大紅龜粿閣有足濟物件，食甲真漲，希望我的胃會當順利消化遐爾濟的食物。若是為著減肥去行媽祖的人客，我勸你去走運動埕較贏。

雖然我的跤婆行甲膨疱，跤予「夾仔鞋」磨甲破皮流血，疼甲哀哀叫，尤其佇濕澹的環境，毋過我猶是硬弓落來矣，相信後擺袂有比這擺的旅途閣較辛苦--的。有時我嘛佇想這可能是媽祖的試驗，祂咧考驗我的能耐，看我敢有才調佮祂行仝程無。後來可能是因為媽祖顯靈，轉來厝歇睏無幾日就咧欲復原矣，有影是有拜有保庇。

坦白講我這擺的旅程是哼聲贏過笑聲，過程一直毋是真爽快，但是仝伴--的就會佮我互相鼓勵、開講，明明是無話通講，煞硬欲炸話講，嘛算是真貼心，真多謝in的話字。我嘛有佮「生份人」開講，雖然無熟似，但是佇這時陣阮算是仝途的朋友，互相討論這幾日行程的代誌，互相分享感想，解結寂寞的心情。

這擺的媽祖出巡我學著真濟嘛看著真濟，佇台灣這塊土地有一群對信仰十萬分的虔誠的信徒，我對in有十萬分的敬佩！雖然我佮九工八暝無結著緣，相信後擺若是有機會，我會閣佮媽祖婆行鬥陣。