Hongtin Tsok-gia̍p bāng

　這擺大甲媽遶境圓滿的結束啊! 出發進前的心情，逐工攏足緊張但是抑有期待，舊年是一工的體驗，這擺是九工，心境自然抑是無仝……

　　第一工出發，一路上看著逐家拿著令旗，心內就感覺足歡喜，因為逐家攏是為著媽祖來做伙行。但是後來開始落雨，一滴一滴到越來越大，開始有淡薄仔感覺無順利，毋過有朋友互相鼓勵，一路上是唱歌、開講，第一工腳就膨疱啊!但是包包咧，繼續行，經過輕鬆、跤痠、麻痺、歇睏的輪迴，後來我就抱持一種「行，就對啊!」的心情堅持，一步一步行。

　　這擺九工的體驗，感覺咱台灣人真正是足熱情，毋管行到佗位，逐家知影你是為媽祖來行，攏會對你好，全世界有佗位親像台灣，九工免開錢就有所在予你食、住、洗身軀……　經過這擺我感覺家己是一个適應環境足緊的人，出發進前攏會煩惱無所在睏、洗身軀欲按怎樣，事實是因為傷忝這寡代誌煞變無重要，凊彩就會使解決啦!　抑有所改變，以前遇到代誌貧惰做無想欲做，但是你若毋行，誰人會幫你行? 看到朋友抑是足忝，但是in攏有忍耐，所以就想家己一定抑會使，只要莫放棄攏有希望啦!

　　大甲媽遶境活動，是眾人的熱心閣有信仰的力量遮有的。遮爾仔好的活動，逐家就愛好好珍惜，食飯的時陣愛感謝，毋通浪費，抑莫烏白擲糞埽…..最後愛感謝一路幫助阮的朋友，若是無in的幫贊，靠阮家己是無法度完成這九工的活動。