Hongtin Tsok-gia̍p bāng

    對這禮拜開始，總算是會當專心讀冊囉！兩个社團的代誌攏告一段落矣！系內的代誌嘛攏差不多結束矣！我欲開始足認真足認真讀冊囉！希望期尾考的分數袂傷歹看！
    這學期上尾的一件代誌就是鐸聲合唱團的送舊活動，雖然講阮合唱團欲送的長學姐無蓋濟，毋過阮每一个人攏挈出百分之百的氣力歡送學長學姊！希望予in有一个足美好、快樂的暗時，而且閣希望in會當懷念當初這个摻大家作伙打拚鐸聲合唱團，有閒的時陣就定定轉來共阮看！

       最近一直咧趕報告，猶閣有看冊、背冊，有一寡仔是家己造成的，毋過有真大原因是因為欲歇熱矣，全部攏積積作一伙，代誌是愈做愈濟，半眠1、2點睏是定定有的代誌，毋過對我來講，這根本著毋是正常的代誌！睏無6點鐘著愛開始面對足濟代誌，根本著睏袂飽，最近早起起來，心情無偌好，到學校面對同學實在是笑袂出來，只好面臭，對朋友真拍謝。

    有的物件閣是愛和別人合作，愛趕時間、別人做毋好閣愛家己做一擺，增加家己的空課佮負擔，實在是足沗的!真正希望我會當佇這禮拜提早做好應該做的代誌。

    『食』在予人袂安心，最近新聞常常講著『毒澱粉』的事件，予人聽著就驚驚，真濟食物攏有問題，黑輪、豆花、芋圓、粉圓、肉圓、「布丁」遮等等的食物，予人感覺這馬食物件實在袂放心，前一陣仔，我才拄好共「泡芙」食入去腹肚，煞佇幾工後，看著真驚人的新聞，原來生理人用過期的原料做「泡芙」，害我驚著，心情無法度用文字來表達。

佇咧欲畢業的這禮拜，逐仝攏咧想猶有啥物代誌無做，抑是猶有啥物代誌無完成佮實踐的，欲畢業才知影佮政情想的完全無仝款。開始有無仝款的思想，無仝款的情調佮無仝款的氣口，逐家攏變甲誠坦白、誠敏感，無人規定氣氛的起落，紲逐擺攏用啼哭聲結束，彼種心酸酸的感覺著會佇這時陣流過嚨喉予你感受酸楚的滋味，離別的苦澀。無人會當解釋未來會變啥物款，但是阮相約五年佮十年以後，阮欲閣鬥陣講以前，講阮大學快樂的記持。

今仔日是警專放榜的日子，猶袂查的時陣，一直緊張，佇看著成績的當下，心中的大石頭總算是囥落來矣，這一年來的努力，總算是無白費，但是考著了後，愛較緊整理心情，紲落來的兩年嘛是誠重要，因為這影響著未來下單位，汝的表現會是按怎，希望以後的警察之路，順順利利，予人尊重！

最近拄著一寡代誌，予我佇咧想家己的決定敢是著的，尤其是毋知影家己所做的，佇別人遐，對伊來講敢有重要。毋過有時陣只是一个人佇遐想，嘛無較縒，規氣逐家共話講予清楚，按呢嘛會使予家己看較清楚、看較開咧。

真感謝有一陣好同學好朋友，佇我的身軀邊共我做伴、聽我講心事，雖然講怹會使予我建議，佇邊仔提醒我，毋過上尾做決定的人猶是我，我知影毋管我做了啥物決定，怹攏會支持我，上濟是等我踢著鐵枋矣，怹猶是會佇仝款的所在等我，予我倚靠。若是無怹我真正毋知欲按怎才好。