今仔日佮朋友去食一間叫tofu35的餐廳，伊的裝潢是親像咖啡廳，餐點卻是韓式料理，而且小菜會使一直點，上特別的是水啉起來酸酸閣甜甜，算是袂䆀，毋過內面有一寡仔吵，可能是好食到傷過歡喜啊，佇公共環境嘛是愛注意家己的行為莫造成別人的困擾較好。
昨昏半暝雷公佮爍爁拍未停，規个攏蹦蹦叫，足吵，害我三更半暝睏未著，世界末日可能欲到啊！這幾个月的天氣攏足奇怪，一睏仔落大雨一睏仔日頭赤焱焱，因為天攏屋白落雨，我的雨傘已經無見幾若隻啊。
這個禮拜，誠歡喜認真寫的教案有通過比賽的初賽，想當初在誠濟報告的壓力下，寫的教案原本以為無啥信心，結果老師改了講誠好，第一擺的經驗竟然有好的結果，害我有淡薄仔驚著，今仔日，為著紲落來的比賽，愛拍20分鐘的教學示範，有岱儀的幫忙，誠順利有小朋友會當作學生聽阮示範，人講：台頂一分鐘，台下十年功，作老師嘛是共款。我站佇台頂，教案寫了擱卡好，無膽kap經驗亦是無效，尤其是我的個性擱閉俗，佇台頂講話愛講乎輪轉實在是愛誠大的挑戰，和同學配合，作伙完成這擺的任務，輪著我的時陣，我負責chhōa頭唸課文，我講我唸ㄧ句，唸完ㄧ句，怹kap全部的課文攏唸完ah！後壁的情況愈來愈失去控制，尤其是遊戲這個部份，擱有小朋友leh冤家，結束了後，規個人親像沒氣的雞kui，誠忝，愛作ㄧ個老師真正無簡單，上尾，小朋友講的建議，雖然和教案無直接的關係，毋過，這擺確實是ㄧ個真難得的經驗。
愈靠近畢業的時間愈感覺有ㄧ款離別的氣味，毋論是系上抑是社團，拜一，是社團的祝福學長學姊畢業的活動，本底，經過頂禮拜的成果發表會，已經誠添，想講明仔載活動擱考慮看賣，毋過，有規個誠照顧我的學長學姊畢業，想講無知後擺見面是何時，想起來心著酸酸，甲果子愛拜樹頭，做人愛有情義，所以我抑是準時出現佇現場，這工，我的心得有兩個，ㄧ、社團感情誠好，親像ㄧ家伙仔，二、社團chhōa頭的人誠重要，無仝的人有無仝的風格，所有的結果著有無共款的效果，以前，攏是和學長姊去餐廳食飯，今年，誠特別是包水餃，因為新的社長認為去餐廳食飯無大家做伙的感覺，熟識和熟識的坐作夥，按呢著無意思阿，經過包水餃的活動，每ㄧ個人攏會使參與，是誠歡樂的活動，了後，是感心的時間，學長學姊是今仔日的主角，講了誠濟心內話，相信在場的人攏誠毋甘。畢業，是一段結束嘛是開始，時間過了誠緊，希望明年我會當順利照期畢業。
最近的天氣實在是足䆀，每一年的這个時候攏是按呢，有時陣落大雨，但是過毋偌久，就出大日頭，熱甲欲死。面對按呢的天氣，逐天攏親像咧表演，一直換衫，短褲、長褲、䘥仔、外套……換來換去，嘛是足麻煩。
今仔日佇咧網路看新聞的時，看到可能有風颱的消息，雖然無一定，但是我有一寡驚，因為風颱的時，風大雨嘛大，實在是足危險，嘛會有人會受害。但是也有一寡期待，因為按呢就會當放風颱假啊！！唉，敢會使放風颱假，但是莫有人受害！
最近幾工小可仔感著閣有著痧的感覺，五月節彼工精神起來，發現眠床頂攏是血，予我驚著。洗衫洗被洗甲真忝，原來就是查某人逐個月的彼來洗，莫怪進前彼工遐爾眩。我逐擺來洗攏真疼，真正愛苦勸逐家查某同學毋通食冰，像我愛食冰，逐擺攏有血堅做一塊一塊，對身體誠無好。
這擺五月節無轉去厝，無法度食著外媽包的粽，真數念。暗時咧欲過十二點的時，感覺真想厝真空虛，就去7-11買粽，7-11的粽又閣貴又閣無厝內包的彼一味，予我真傷心，只好交代小妹幫我留幾粒粽等我會當轉去的時才食。
今仔日是這門課ê期末考，結果我煞睏過頭去，因為手機仔無電，我嘛袂記得充電，所以鬧鐘著無響，唉，後擺千萬愛注意！其實我最近定定leh想，我到底讀這是欲做啥? 講實在，我雖然毋是講真討厭學這，抑不過，我嘛無講對這真有興趣，假若只不過是選一個國立ê大學來讀，因為大人lóng講：一定愛讀冊才有路用。我嘛無知影甘真正是按呢，我只知影我親像一個無想法ê空殼，人講啥我著去做啥。表面上是順爸爸媽媽ê意，其實我根本著無知影我家己欲有啥款未來，真恐怖。
