未命名-吳雅萍-台語小說(一)－Hongtin Tsok-gia̍p bāng

又擱到了學生上愛ê歇熱時間，當佇leh讀大學ê我，一到了歇熱，那毋是有參加營隊，就是閒閒佇厝tshit-thô。毋擱，今年我決定好好利用這段歇熱ê時間，去tshuē短期ê工作，thàn寡錢做sóo-huì兼學社會經驗。透過朋友ê介紹，我佇學校附近一間民營ê加油站應徵著頭路，阮阿母雖然毋甘，毋擱，伊mā感覺這是一個予我磨練ê好經驗，就決定予我留佇台中，這mā表示我今年ê歇熱無法度轉去厝過享受ê日子--á！

我應徵ê加油站是分三班制，有早班（07：00－15：00）、中班（15：00－23：00）佮大夜班（23：00－07：00）。我是應徵中班ê時段，佇正式上班進前，著先實習三工，也就是愛做三工白工。毋擱，是毋免做ka八點鐘hiah濟，逐工只要去四點鐘就好。加油站這個時陣tú好誠欠人，所以，我佇實習三工了後，著愛負責背島。所謂ê島就是有92、95等等ê油類（逐間加油站攏小寡仔無仝），而且雙爿攏會當加油，擱有扑發票ê機器、電腦佮一寡仔物品ê所在。背島ê人著愛負責島上大大細細ê代誌，上重要ê是「錢」！佇彼工若是有thàn錢，著做班ê基金；若是有了錢，背島ê人著愛負責，也就是「thàn ê算公司，了ê賠家己。」

為著三工了會當順利背島莫了錢，佇第三工實習ê時陣，領班問我敢欲做較久--ê，我想想--ê mā好，其實我mā會驚家己一無細膩會了大條--ê。因為這是民營ê加油站，著用會員日降價ê方式來吸引人客。一禮拜有兩工ê會員日，佇我欲背島ê彼工，拄拄好就是會員日，也著是會有真濟人客ê時間，真正是一個足刺激ê考驗！