有外久，毋捌踏上這片土塊。有外久，毋捌看到這個熟識的夕陽。
有外久，毋捌來來這間國校仔。有外久，毋捌佮這個莊仔頭的人講過話。
有外久，伊有外久毋捌返來過，這個叫故鄉的所在。
「請問彼個全莊上好giá的李家現子時搬去佗位啊？」
「哪一個李家，喔，彼個上有giá的李家喔，我會記挨幾年前就搬去市內--ah」應該是早就搬走--ah。看賣檳榔的阿伯著欲袂記持。
「歹勢，閣借我問一下，彼個張徹強先生住佇佗？」
「張～徹強，啊，阿強伊兜最近搬去佇番仔澳啦，哈哈，才tú搬沒外久著袂記了了，食老記持誠䆀，水姑娘仔，你是欲來找誰？」
「我欲找張徹強，愛去佗位才找會到伊？」
「徹強伊日時佇公所上班，公所內面啦。」
有外久，毋捌閣看過伊。
「你是劉徹強？」白色的siat-tsuh，黑色的ne-khu-tai，同款的黑色眼鏡，也是這瘦，這斯文。
「這位小姐，請問你欲辦啥物代誌？」
「你猶閣留佇這個莊跤所在，阿強，我是林真，甘會記會我？」
「林真…你是林真？你…那會變成這款？我會記得你是去台北作女工，啊…那會變這款？」
彩花仔色水的短洋裝，瘦直的大小腿配上黑色的絲襪仔，十公分的咖啡色高踏鞋。抹著粉的面，胭脂紅紅的佇伊嘴唇頂面，長長的目睫毛底是美麗的雙眼，長長的頭毛染著黃昏的色彩，手中的太陽眼鏡對照伊的黑手套，紅色的金面皮包佇肩胛頭閃爍反光。
頭搖兩下，嘴角勾起，「女工？作女工我著愛枵死--ah！你若是去過台北，著知什麼叫作生活甘苦。」淡淡笑容真使人注目。
「那安內你為什麼欲返來瑞芳？」為什麼林真發達了後閣欲返來這個小莊頭？
「我欲搬返來瑞芳，我想欲搬返來，你會使替我佇九份仔找一間厝沒？」
「你這幾年來到底發生什麼代誌啊，連一句電話一張批攏無，你甘知你消失外久？你阿姐三不五時就一直打電話來問我，我干焦佮伊講我沒法度…」
「你真正想欲知？…好，你若想欲知我著講乎你聽。」無奈的笑容浮起，顛倒親像黃昏的日頭落山了後的灰色，若是時間閣在重來一遍，毋知我閣會作仝款的選擇？若是時間閣再重來一遍，毋知我甘會後悔？
(第一章，下禮拜)
留言列表
