Hongtin Tsok-gia̍p bāng

         大甲媽祖遶境，欲出發進前真驚物件沒帶齊全，結果佇行大甲媽的時陣，發現行李真正有夠重，偝到我的跤頭趺真疼，頭一工我、李亭、雪兒佮思穎行到腳膨疱，阮位暗時十點行到透早八點，差一點強欲哭出來。後來，慢慢仔熟似真濟人，有一寡阿叔、阿姨攏替阮加油，馬講真濟做人的道理。有一個阿伯人真好，因為伊是騎機車較快，所以攏會先幫阮揣所在通好睏，予阮會當慢慢仔行，沿路欣賞景緻。

         行完大甲媽了後，真正體會著，為什麼有人講行一遍大甲媽，就會愛著大甲媽，我想是因為逐家的熱情，因為逐家的熱心，閣有因為逐家的互相鼓勵，予行大甲媽的人充滿著溫暖佮人情，這種體驗實在是真難得、真趣味。

         九工八暝的大甲媽就按呢結束矣！雖然會當毋免閣煩惱明仔載欲睏佗，嘛毋免為著無所在洗身軀著驚，毋過，佇大甲媽當中感受著的人情溫暖是佗位攏無底揣的，連見攏毋捌見過的人，會佇你拄著困難的時陣第一時間共你幫助，志工規暝無睏準備食的、啉的、用的，只是為著欲予進香客更加舒適的綴媽祖行，in毋驚辛苦，無求啥物回報，予大家就算講佇寒人的落雨天嘛感受著溫暖，「原來這就是媽祖的力量矣！」綴媽祖行的這九工，逐工攏感受會著這款心晟。

         阮這七个人真正是足幸福！一路頂一直有好心的人共阮鬥相共，共阮揣睏的所在，閣報予阮知佗位當洗身軀，破病嘛足熱心對阮講會當tshuā去予醫生看，若像咧家己的親人仝款，因為台灣人的熱情佮溫暖，原底足艱苦的綴大甲媽行，攏變成一種歡喜心佮心甘情願矣！而且閣感覺時間過了真緊，一直到大甲媽結束了後，就賰毋甘離別的心情矣……這擺綴大甲媽行，得到的毋但是經驗，上珍貴的是心靈的提升，而且予我更加知影珍惜人佮人之間的緣份佮感情。

拜二早起我去參加布袋戲見習，這擺是到忠孝國小表演予遐的學生看，一開始我感覺真緊張，因為我對操作布袋戲偶無講蓋厲害，嘛真怕會出差錯，但是王英峻老師真有經驗，伊知影應該予見習生啥物款ê工課是會當學習閣會當耍ê，除了鬥相共提道具以外，基本ê操作戲偶嘛攏予阮親自上場演予學生看，特別歡喜ê是，這擺老師予我穿人偶裝，演一个戲份真重ê角色，予我有閣較濟學習佮表現ê機會，這擺經驗予我對布袋戲佮台灣文化閣較感覺有興趣矣，實在真多謝王英峻老師ê指導佮鼓勵。

頂禮拜阮出發去行大甲媽,真正是真特別的體驗,頭一工就落大雨,衫佮背包攏予淋甲澹糊糊,扛轎行甲真緊,阮若是歇睏一下,伊就真緊就超過矣,這九工,阮攏咧佮媽祖耍走相逐,路上有真濟好人,阿叔佮阿姨綴阮攏真好,看著阮行李足大包,就會甲阮鬥載行李,因為阮第一擺行九工,毋知行李愈少愈好,所以到後來阮攏行甲足忝,點心站有足濟好食的物件,有包子,粽子擱有大碗的炒麵,沿路擱有人提西瓜,水果佮飲料予阮,行了一工,阮的背包佮腹肚攏滿滿,到了欲洗身軀的時間,阮就去附近別人的兜借洗身軀間,但是逐工攏佇捌人兜洗身軀,感覺怪怪,抑是佇家己兜甲慣勢,這九工尚麻煩的是落大雨,暗時阮佇帳篷睏的時,就會滴雨入來,外口的衫嘛會淋甲澹糊糊,紮著一包澹糊糊的衫行九工真正足忝,但是為著阮重要的學分,講啥物攏會和

 　　這禮拜我佮同學去行九工的大甲媽，阮到大甲的時陣，一路上著一直咧落雨，到大甲的時落閣較大矣，而且阮去的時間有淡薄仔接近大甲媽欲起價的時間，所以阮攏足緊張矣，緊去買旗佮拜拜，然後著開始對人行，欲出大甲進前有一條橋，阮行到欲尾仔的時，橋頂開始放煙火，阮底咧橋的另外一邊看，真正有夠水欸。

　　頭一工阮半暝攏無睏，一直底咧趕路，因為會驚去乎大甲媽趕過，按呢阮著閣愛一直趕路，會閣較忝，抑無擱第二工透早阮著感覺阮已經忝矣，大家坐底咧路邊攏無想欲佮行，想欲坐車又擱等無，好咧加在尾矣有一個阿伯有等到一台車，而且彼咧阿伯著底咧阮邊仔，阮才趕緊對伊後壁上車。

四月十六日，後禮拜就是期中考矣。

　　頂禮拜綴著大甲媽去踩街，因為是我頭一擺去行，感覺真趣味，猶毋過拄開始行ê時陣，感覺真忝，第二工ê時陣跤頭趺著開始疼矣，而且日時佮暗時ê溫度差真濟，彼當時我無紮會使蓋ê物件，所以暗時欲睏ê時陣真寒，到新港ê時陣袂勘得，敲電話叫我阿姊送睡袋予我，我才袂遮寒。這一路上嘛有真濟食ê物件，予阮腹肚枵ê時陣有物件通食，猶毋過大部分攏是素食，其實食足濟工了後有淡薄仔飫，因為足想欲食肉，所以彼幾工我攏是食炒麵較濟，這馬轉來了後，猶原感覺真懷念，明年應該會閣去。

實在真歹勢，差一點仔就袂記愛交這禮拜ê青春記事，好佳哉有同學ê提醒。

uì頂擺ê青春記事到今就發生真濟代誌會當記錄矣，親像頂禮拜ê大甲媽繞境，雖然是頂禮拜發生ê代誌，毋過嘛是真有記錄ê意義，相信這擺ê體驗對所有ê人來講，攏是真特別ê經驗佮體會。第一擺行遐爾久ê路；第一擺會當佇路邊提物件食免錢；第一擺看著遐爾濟人過橋ê畫面，而且人佮車已經無分你我，攏是相讓；第一擺佇路裡行路愛隨時注意當時欲放炮仔，看阮這群人一發現欲放炮仔就趕緊旋，同時嘛是第一擺看著一群人一直向仝一個方向向前，怹ê目標干焦一個，著是綴媽祖幫助眾生，保庇家庭，保庇厝內人ê健康，保庇台灣ê這塊土地會當風調雨順，人民ê生活袂歹過。