Hongtin Tsok-gia̍p bāng

真驚我會閣袂記的寫生活週記，所以決定一擺寫兩篇，補補ê，講著最近佇咧無閒的待誌真濟，看著逐家攏有物件愛用，學期嘛過了欲一半，靠近學期尾，真濟物件攏開始要求愛有成果出來，這是一個紀錄，嘛是一個真麻煩的工作，毋過這遮會使予家己知影家己到底完成了啥物，講起來無做閣袂使！另外想著五月十八號是咱學校主辦的中區社團運動會的大日子，其實真趣味嗎真期待這活動，因為這擺運動會的內容攏是靠阮學校各社團代表去完成的，實在是無簡單，希望活動會始順利進行!

因為期中考彼週沒有寫生活週記，害著我紲落來這週煞袂記愛寫，熊熊想起來，已經是拜六啊，實在是有小可仔驚著，雖然講期中考週彼週已經過啊，抑毋過其實亦有真濟報告和考試是佇咧後面這週開始，一直感覺期中考猶未結束啊~~最近待誌真濟愛做，尤其是社團的評鑑內容，根本就是地獄!因為前一陣仔，我的電腦歹去，提去原廠公司修理了後，電腦一打開，我才發現資料全部攏沒啊，企劃書和報告書閣會使慢慢仔重打出來，抑毋過參像會議紀錄彼種資料是愛叫我按怎生，有一種欲哭無目屎的感覺，唉!講遮嘛無效，趕緊去補資料較實在!

最近實在足無閒，足濟ê代誌攏卡佇咧仝一个時間，期中考嘛是足無簡單，遮佇咧今仔日考煞，紲落來嘛無法度閒著咧，系上ê活動猶閣有社團ê成果發表會，攏足有夠我無閒真久，逐擺攏佮家己講，只要再擋一站阿，到放假ê時陣著會當喘一口氣矣，毋閣代誌攏做袂了，有時陣真正足想欲哭，真想欲轉去厝裡。但是我知影，這馬已經毋是in-仔，所以要學會曉時間ê管理，盡量勿予家己無閒到遮爾暗，嘛才會當更較有效率完成每一件代誌，因此，紲落來歇睏過後，我又袂開始拍拚ê奮鬥矣，加油!我相信我一定會當eh。

　　這站仔，我為著學校的代誌真的感覺足齷齪，毋干焦有系上和教程課的報告、作業，抑有歇熱的時欲去南投縣信義鄉久美國小𤆬小朋友的史懷哲計畫，一下仔著愛寫教案，一下仔著愛練早操，爾且閣愛撥一寡仔時間去開會、練習。原本的我著已經有夠無閒，這馬閣加這項史懷哲計畫，我規个人真正是強欲往生啊!逐工拍開電腦攏有做袂完的報告，我實在是已經欲起痟囉!毋知影愛到底當時，我才會使放予輕鬆，毋免面對遮爾濟的工課。若無，我絕對會予打工、功課、史懷哲計畫舞死。

    雖然期中考結束矣，毋過紲落來ê日子是閣較無閒阿!離後擺期尾考嘛才八禮拜，毋過佇這當中我煞有十二件重要ê代誌佮活動袂無閒，這猶閣無包括平常時每科ê作業、考試佮報告呢!每禮拜攏至少有一个，像這禮拜著欲去台北開會，後禮拜ê社團評鑑、擔任藝文特派員志工、以及紲落來ê社團運動會、歌song人文比賽、上台教冊、白話字檢定、期末成果發表……等等，每一个攏真重要而且閣需要真濟時間佮心力才會當有一个圓滿的結局，每一擺phah開行事曆，看著密啁啁袂做ê代誌，著感覺真忝!這馬干焦會使共家己講閣拍拚一下，真緊著會結束loh!然後著是快樂ê歇熱lah!

　　最近的天氣變化大，有時陣落雨有時陣大日頭，溫度有時懸有時下，予人感覺真無爽快。禮拜四上課的時，茂賢老師講欲去逐白沙屯媽祖，愛逐家若是會使就去陪媽祖行路，所以干焦上一節課爾爾。因為媽祖差不多佇大肚附近，同學拍算欲騎機車，所以伊就載我做伙去。

  這擺ê期中考狀況誠䆀，予人心情鬱卒，發現家己無法度同齊兼顧兩ê希望，人真正袂使傷高估家己，有一寡仔代誌毋是料想袂到ê，人生充滿變數，佇這咧社會中有誠濟不公不義ê代誌，到最後勝利ê人大部分是卑鄙心機ê，著算無實力只要靠一支嘴著會使打天下，有實力ê人顛倒愛付出愈濟，毋知啥物時陣社會變敆遮爾烏暗，愈大漢愈了解世界ê無單純，誠希望我會當永遠做一个無煩無擾ê囡仔，永遠免去了解遐的垃圾代誌，愈大漢真心ê笑容卻漸漸消失啊，歡喜攏只會當是暫時ê。

　　期中考週就按呢結束啊!這个學期抑過一半啊!想看覓家己這幾个月做了啥物，讀了啥物冊?讀冊是一種習慣，若是每一工攏有讀，考試的時毋免驚，一定會順利。

　　定定做的代誌就會較進步，親像阮這組的錄音時間抑是愈來愈少，逐家抑愈來愈有興趣，以前攏會驚錄音，愛花足濟時間佮精神，這馬較熟啊!逐家只要踏入去錄音室，親像打開一个開關，氣氛就會變成快樂的，佮朋友親像平常時開講按呢，厚話抑變做一種鬧熱的表現，輕鬆快樂的做節目，嘛足歡喜，希望未來阮的節目會當愈來愈趣味!多謝我的組員，in攏足古錐，抑足感謝聽眾朋友。

農曆3月23是媽祖生，袂少所在攏有媽祖遶境的活動，所以會使說講規个四月阮攏咧逐媽祖走。對一開始的大甲媽，一口氣tio̍h綴了九天，嘛見識到了信眾的虔誠，只是一直落袂停的雨實在造成了真濟麻煩。

轉來到了學校之後，度過了艱苦的期中考，連鞭擱去追著白沙屯媽佮北港媽。白沙屯媽隨意決定行進的路線非常趣味，只是阮都已經無氣力去綴伊行了，只好期待下擺的機會。北港媽是朝天宮的周圍放著無停過的炮仔佮煙火，第一擺去真正感受到足大的震撼，遐爾大量的炮仔佇其他兩個媽祖是看袂到的。明年假使有擱較濟的時間，一定愛找機會多多去體驗。

　　今阿日ê保齡球課, 確信家己ê特質, 一步修正ㄧ步, 修正上ㄧ步ê姿勢。真濟代誌嘛攏是按呢, 其實我bē明白, 發呆是什物感覺, 大腦攏是一直teh反省檢討, 騎車、上廁所ê時陣,攏是一直teh想, 我一直認為無什物, 但是發現我會當看kah比同伴koh-khah遠ê時, 發現我是ㄧ直teh用心檢討家己, koh-khah成熟,是我一直對家己ê要求, mài家人擔心,就是beh 予in放心, 我會反省,續落來beh kah明確ê行動以及成果,想beh ê物件我就一定得到,會放縱家己養成,這企圖心, 畢竟年少不輕狂枉少年阿。

5月1日 天氣微涼

     這个月的活動實在是不止仔濟，媽祖生日、遶境，一直愛走外口，聽同學講，伊已經个外月無轉去厝的矣！參加遐爾濟活動，增加足濟經驗，予我的大學生活變甲足精彩的，毋過，耍甲遐爾歡喜，嘛是有費氣、無好的所在。

    現實來講，著是錢的問題，火車、客運、食食等等，開佇交通內底的錢塊欲規千箍矣，加上其他的代誌，我無細膩共4月的所費佇4月上尾一工開了了矣，偆10箍，實在是足恐怖的!

期中考總算是考煞矣！因為這學期我總共有29个學分，所以對我來講，足濟考試範圍愛準備，每一本愛讀的冊攏遐爾大本，疊起來若親像山；閣有一寡無仝款的報告愛做。

我佇三禮拜內底對到四位媽祖，大甲媽祖、白沙屯媽祖、旱溪媽祖閣北港媽祖。白沙屯媽祖佇對伊進前就知影這位媽祖的個性是按怎，無車閣無有網路功能的手機仔，欲對白媽是一件無簡單的代誌，因為根本毋知影媽祖會傱去佗位，好佳哉茂賢老師有予阮一支工作人員的電話號碼，閣有好心的同學旻翰，閣加上媽祖的加持，我紮著緊張的心情坐火車去台中港火車頭，足緊就揣著媽祖矣。這擺又閣是佇台中港火車頭，當初大甲媽最後一工我嘛是到遮來對媽祖，看到媽祖的轎的時陣足歡喜矣！我總算是拄著我一直想欲對的白媽，白媽真正足性格嘛足親切，對白媽嘛是一件足好耍的代誌，因為咱永遠毋知媽祖欲衝去佗，啥物時陣媽祖欲停落來。我有想欲去扛轎，尾仔嘛是搶不過有經驗的阿姨，希望明年會使有機會為白媽服務一擺。

        行過大甲溪橋的時陣，有一款，阿～我閣轉來阿，對媽祖行，這已經是我第三遍行過大甲溪橋矣，大甲溪橋頭前的加油站我嘛毋知經過偌濟擺矣，感覺對媽祖行，甲南遐我已經足熟識矣，可能彼个所在共我有緣吧！這工對白媽點多鐘媽祖就停轎矣，小寡仔可惜，明年～我閣欲對白媽行一段！！

最近擱有參加白沙屯媽祖佮北港媽祖,佮進前參加的媽祖比較,三個媽祖攏有無工款的所在,其中上好耍的是白沙屯媽祖,因為白沙屯無固定的路線,媽祖有可能行去任何所在,聽老師講進前擱有用行的行過濁水溪,但是因為明仔載擱愛上課,所以阮只有看了起駕綴媽祖行一段就轉來,阮後來擱有去一擺,媽祖行到一間菜市場,就欲行去內底歇困,看著有啥物所在就想欲入去,真正是一位足有個性的媽祖,後來阮擱有去北港看媽祖,北港的鞭炮用佮真濟,攏是一車一車咧載的,我看內底的工作人員的面攏是黑的,歸身軀攏是鞭炮炸著的傷口,看的出in真正是足虔誠的信徒,後來阮拍算欲轉來台中的時,發現已經無車會當坐矣,所以阮坐火車轉來的時陣已經足暗矣,雖然活動攏真忝,但是真好耍