Hongtin Tsok-gia̍p bāng

首先我欲先感謝系上老師的贊助，

猶有贊助咱包車去立法院的各界人士，

因為有in的贊助，咱才會當毋免考慮車錢的問題，嘛會使上台北靜坐，

這擺的全民運動愛感謝的毋但是立法院遐的學生，

閣較欲感謝提供物資佮金錢援助的人，

因為若是無in，著無坐佇遐的學生，

期望我以後嘛會使成為幫助正義的人，做正確的代誌。

拜四是我第三擺去立法院，毋過這擺予我的感覺閣無仝，

凡勢是因為日時的關係，所以逐家攏去上班、上課，

嘛可能是因為逐家攏予警察嚇驚著，毋敢閣再去，

所以現場的人正經無濟，我坐佇立法院內底，

聽著志工咧講：「欲參觀綴我行，頭前有翕相的所在。」，

外口的街仔路舞甲親像園遊會，

看著這款情形，我煞毋知欲講啥，甚至感覺有淡薄仔凊心，

因為阮是來保衛民主的，毋是來立法院tshit-thô矣！

下晡學生代表出面召開記者會，講三月三十號欲上總統府抗議，

希望逐家做伙來參加，我想這擺的抗議一定愛成功，

予政府正視咱，回答咱的訴求，著是「退回服貿，捍衛民主。」，

民主袂佇天頂落落來，咱一定愛繼續努力，我相信一定會成功矣！