close
大甲媽
今仔日去虎尾佮西螺看一年一擺大甲媽的鬧熱，行的路線佮舊年的路線是相仝的，所以有真濟懷念的感覺，嘛有真濟新的體驗。
一落車就拄着報馬仔，報馬仔的衫褲真有特色，一隻褲腳跤撆起來 ，穿一隻草鞋，擱戴一頂笠仔，所以一看就知影伊是報馬仔。本來想欲共伊討一條紅線，送予親情，希望伊會得到一个好的姻緣，不過報馬仔講伊無紅線啊，有淡薄仔失望。毋過媽祖也是足疼惜咱的，無予阮紅線，煞予阮硩轎金。我佮同學行路行到忝的時陣，拄好有載香客的車經過，坐起佇車頂了後，有一个大兄足熱心，一直佮阮開講，另外擱送阮伊提來的硩轎金，真正使人感動。
雖然天氣熱佮予我的汗大滴小滴咧流，毋過路途中央也感受到台灣人的熱情佮in的好意，這擺嘛受到真濟人的照顧，食到青擱好食的番麥、柑仔蜜，路途上嘛有涼的分予逐家，好食的物件食攏食袂了。希望逐家攏會當平安順利，嘛祈求天上聖母會當保庇這馬的台灣。
全站熱搜
留言列表
