close
拜一阮khì行大甲媽。一望無際ê綠色田園、路邊ê小野花閣加上有著古早記憶ê三合院......美麗ê庄跤景緻予自細漢就住佇都市ê我大開眼界。
硩轎金、平安符、福祿符仔、報馬仔ê保平安紅線閣有大師加持過ê五行珠手環，遮ê是我行大甲媽ê紀念品。恭敬坦覆佇轎仔跤求平安、虔誠ê信眾所招待ê流水席猶有足長足長、用吊車吊起來ê炮仔，予我是過了精彩佮驚惶。
對雲林行到嘉義，攏總二十一公里、五个小時ê路途。頭一擺綴著大甲媽行，我得到足多意料之外ê物件。行完一工，大家攏忝囉......明年猶有九工八暝咧等著咱！
全站熱搜
留言列表
