Hongtin Tsok-gia̍p bāng

　　拜一彼日，我佮系上的老師、同學去參加「媽祖遶境」活動。佇遊覽車內，每一个儂看起來攏足歡喜的。阮uì雲林元長鄉開始行，茂賢老師講咱愛盡量綴著轎仔行，毋過轎仔邊攏是儂，攑媽祖的隊伍閣行足緊，我佮吳家瑜同學嘛著趕緊跤步。阮兩儂一看著有儂欲提兩个囥滿金紙的椅條，就知影愛準備搶「壓轎金」啊！頭幾擺無論安怎搶，著是搶袂過遐的阿叔、阿姨，後來搶甲愈來愈有心得，嘛因為提了真濟，著將一寡仔分予跤手無方便的阿公、阿嬤佮有需要的儂，分一寡福氣予in。

　　我除了軁轎跤、搶壓轎金、求著報馬仔予的紅線，閣有摸「文昌筆」，提著何仙姑送的糖仔，抑有扛神轎佮邊仔的聖扇，運氣實在誠好！希望媽祖娘娘會當保庇所有台灣儂闔家平安。

　　我真相信信仰所帶來的力量，因為一路上看著人民無怨無悔的綴媽祖行；父母抱著猶小漢的囝仔軁轎跤；看見轎仔著雙手合十對媽祖拜，有儂拜甲目箍紅紅將欲流目屎；到奉天宮的時，全體跪拜的莊嚴虔誠…，一幕一幕攏予我感動不已，煞袂記拄才的腰酸背痛。

　　明年，阮大二欲挑戰行九天全程，辛苦一定是有的，但是為大家祈福的精神是絕對值得！