仰般培養學生仔｢惜福｣个觀念 家瑜
在這个豐湧又好額个時代，當多人毋記得愛｢食果子，拜樹頭｣，就係客家人講个「食水唸著水源頭」，毋曉得惜福，將得著（doˋ）个東西當做理所當然。這種毋曉得儆(kiang)惜个態度，分人看著當毋盼得，尤其係這下个學生仔，頭擺農家子弟做得看著耕種个爺哀辛苦耕田，毋過這下个細人仔嗄（sa）看毋著爺哀做事个情形，毋知爺哀个煞猛摎辛苦，毋過，毋曉得儆惜爺哀分自己个一切。假使下二擺厓做先生，厓定著會好好教導吾个學生仔，培養佢兜｢惜福｣个觀念。
頭先，厓會帶吾个學生仔去孤兒院或者啟智學校參訪，在厓小學六年生个時節，識摎社團去過林口个啟智學校表演，當時厓看著佢兜有个人智能不足，無法度靠自家个力量食飯、換衫褲个時節，正經試著厓還做得學樂器已經係當幸福个事情！表演過後，厓兜社團分(fun)做小組，摎該兜學生仔搞尞，該兜同學雖然圓身有兜病痛，無法度摎厓兜好好溝通，毋過對佢兜个目珠肚項，確實做得感受著佢兜盡歡喜个心情。單淨因為有年紀共樣个人去陪佢兜尞，就做得分(bunˊ)佢兜當歡喜，佢兜恁樣就試著當滿足个表情，分厓試著吾个生活條件恁好還有麼个好怨嘆个呢？故所厓會請吾學生仔帶兜舊个玩具去孤兒院，分該位个小朋友分享，分佢兜了解，在佢兜一日到暗要求爺哀買這買該个時節，有兜人有一領著著會燒个衫就試著當滿足了。
另外，厓會帶學生仔去體驗農村生活，分佢兜了解｢粒粒都辛苦｣个道理。還細个時節，厓輒輒跈阿姆去姐公姐婆个田項ten手。等厓曬等日頭ten手摘番茄（toˇ ma doˋ）摎蒔田該央時，總係試著當辛苦又kioi又熱，汗流脈絡像落雨，濕濕黏黏个感覺分厓試著當艱苦，想著姐公姐婆無論好天落雨都愛恁辛苦做事，厓單淨坐到教室肚項定定，還有下課放尞个時間，毋使分風吹雨打，實在就無麼个好怨嘆正著，數學題再仰般難，乜毋會比連續（sa）幾下點鐘腰kiamˇ背吊蒔田較難。帶學生仔到田坵後，厓會請耕田人教吾學生仔仰般正確蒔田，再過分佢兜實際做看哪，相信佢兜定著做得了解毋使愁食愁著，坐到教室肚上課，確實係一件幸福个事情。
最近，先生在課堂上放一齣電影分厓兜看，片名安到｢華麗个假期｣，內容係講韓國个光州事件，電影肚个男主角安到民宇，佢摎厥(giaˊ)老弟－－真祐無爺無哀，相依為命，在光州事件肚，民宇親眼看著老弟分戒嚴軍開槍仔打死，佢譴到無命，民宇乜擎起槍仔，加入國民軍个行列，包尾民宇乜分亂槍射死。厓目珠紅紅看忒這齣電影，電影肚个人，在該央時，逐儕人都驚驚險險過日仔，驚自家分人ciiˇ死，乜驚屋家人分人害死，單淨愛屋家人摎親戚朋友在身邊，就係盡幸福个事情。想到這，再想想自家，就算堵著麼个困難，乜毋會試著恁困難了，厓想，分學生仔看過這種電影後，乜會摎厓有共樣个想法，該就係愛好好珍惜身邊愛自家摎自家愛个所有人。（這段可以不用）
在厓高中二年生个時節，先生係一個盡好（hau）摎生活細項下个事情，當做故事講分學生仔聽个人，等厓做先生後，厓乜想愛講兜故事分吾學生仔聽，尤其係上大學後个心情摎佢兜講。吾姆係一個當嚴條个婦人家，在厓還細个時節，佢逐日就揙（bienˋ）吾个書包矣，檢查厓係毋係有亂買東西，等厓知人我个時節，佢乜會看吾个通話紀錄摎簡訊，因為驚厓亂交男朋友影響課業，為著這件事情輒輒摎吾姆冤家，試著吾姆限制吾个自由，乜無想轉屋家，見擺轉去就冤家。上大學起勢，無阿姆个叮嚀囑咐，一切變到異毋慣，就連頭擺理所當然逐日食得著个家常菜，這下乜變到當珍貴。這下，厓逐禮拜盡期待个就係拜五，因為該係轉屋个日子。厓會摎這段心路歷程講分吾學生仔聽，勸話佢兜愛好好珍惜摎屋家人共下个時間，雖然佢兜無法度馬上理解，毋過厓相信佢兜會慢慢了解个。
其實厓相信每一儕人都係善良、知足个，單淨有時會因為得著忒多物質摎關心，毋記得惜福摎感恩，假使厓做先生，厓會時常帶等學生仔分佢兜心肝定疊下來，定定仔愐想，佢兜就會發現，其實佢兜已經有當多物質摎關心，應該愛曉得珍惜，做毋得挑試無看著佢自家个幸福。今下，電子產品越來越發達，逐儕人都生活在自家个世界肚項，故所厓希望以上這兜方法，做得分吾學生仔學會做一個曉得代別人想，曉得珍惜幸福个好學生仔。
留言列表
