close
愛公平、愛自由！
三月十八號，暗時，我閣毋知影台灣發生遮爾仔大的代誌。
三月十九號，一透早欲上八點的課，佇火車頂懸耍手機的時陣，十個朋友有八個攏咧講「服貿」這項議題，tsim-tsiok研究了後，才發現這對台灣的影響有偌大。和朋友討論了後，藉著一種「衝」的意念，阮四個朋友連鞭tsông去高鐵買票準備前往台北立法院，這是一場針對無公平的行為的抗爭，我感覺這佮政治雖然有關連，猶毋過阮學生抗議的是無公平的審議程序！黑箱作業！
一到台北，阮tsinn--ji̍p-khì立法院議場頭前的空地（其實攏已經khiā滿滿的人）坐落來，聽廣場中央的主持人佮逐家報告上新的狀況；聽來自無仝領域的人對這項代誌的感想、看法。現場誠平靜，逐家攏誠有水準，並毋是像電視咧報的彼款–「學生啥物都毋知，予政黨利用！」。親身去體會就會當了解遐的學生為啥物會去抗議，有人講：「學生攏毋好好阿讀冊，去綴人抗議有啥物路用？」我的看法是–國家攏欲毋去矣！讀冊有啥物路用？
轉來台中了後，我揣誠濟資料來看，嘛一直注意、關心這項代誌，這是咱的年代，咱的自由愛家己拼，頂一代的前輩，已經替咱拍下自由的前鋒，咱愛有抗爭的勇氣，袂當做「火無燒著我，抑無要緊」的人！
天佑台灣。
全站熱搜
留言列表
