什麼？你這咧人甘未傷超過？平常時欺負我、糟蹋我不打緊，即嘛，竟然愛我為著會當予你順利畢業，必須愛對大家自我介紹而且閣愛講我對你的感想？好啦好啦好啦！誰叫我命格歹去佇著你，我實在是有夠衰个衰呢！
Hello！大家好！我的名叫做黑仔，毋閣，平常時干單我的主人蕭涵文會按呢叫我，其他的人攏叫我「是白痴、是白痴」，哼！其實我一點仔都袂憨，我毋若聰明乖巧有靈性，緣投古意閣好笑神咧！會去予人叫這呢歹聽的名，攏愛怪阮兜彼咧天兵阿母啦，誰叫我一出世，伊就甲我結一塊排仔，頂懸寫一排號碼：伊講honn，是因為伊毋識字兼無衛生，生生歸大陣囝仔，掛名牌編號碼較好記啦！
唉，講到這我就歸腹肚火，是安怎阮阿兄的號碼就是「888」發發發，阿我的就是「487」是白痴啦！
自細漢，我逐擺考試我攏是阮班的第一名，逐款比賽，只要有我出面，嘛一定萬事ok，所以我真正想攏無呢，是安怎天公伯欲安呢捉弄我，「487」這三個歹吉兆的號碼根本就無適合我嘛！
毋閣，就佇我滿18歲生日彼工，我總算知影我的號碼是安怎是「487」啊‧‧‧‧‧‧
彼工，是我頭一遍見到我的主人，伊是一個妖嬌美麗、熱情活潑，閣有想法的查某囝仔，恁大家一定想講：「哇，你真正是好狗運，會當遇到一咧這呢好的新主人！」喔！代誌才毋是恁想个安呢咧！恁千萬毋通去予伊的外表騙去阿，其實，伊是一咧脫線、兩光、行路閣行袂穩的阿呆，「487」這塊排仔根本就是佇講伊阿！
恁甘有看過有人停車了後，煞甲鎖匙插佇原位个無？阿若無，就是逐擺停車了後，攏會袂記得伊甲我囥佇什麼所在，上離譜的就是逐早起我睏抑未精神，伊就急欲出門，攏無顧慮我準備好勢未，就拼性命tshui到進磅，喂！拜託我小借問一哩，是佗一位勇士會當一起床就開始佮人走相jioh？你嘛較好心好幸咧，幫幫忙(國語)好無？按呢我是會著內傷呐！
雖然講，我的主人真正有小寡仔ham3，毋閣論真講，伊个人真善良，嘛真用心照顧我，毋若袂予我夭到，嘛袂予我寒到，逐禮拜閣會甲我洗甲清氣溜溜，算是真認真佇佮我交陪。毋知影我閣剩偌儕時間會當陪惦伊的身軀邊，毋閣我決定矣，我欲作伊上介死忠、上介貼心的好朋友，無論是快樂、生氣、鬱卒抑是目屎流目屎滴，我攏欲靜靜个在伊身軀邊保護伊、支持伊，互相吞忍、互相扶持，作一世人換帖的麻吉！
留言列表
