Hongtin Tsok-gia̍p bāng

    這禮拜ê天氣真無穩定，有時出日頭，有時烏陰天，有時雨霎仔天，有時摔大雨，天氣變化真濟款抑真歹予人去臆測，毋過落雨ê機率是較大出日，出門是較無方便。

    大部份ê人攏無佮意落雨天，我感覺落雨天其實猶閣袂䆀，為啥物咧？因為會使遮雨傘！我真歡喜會當佇落雨ê時陣遮雨傘，感覺足好--ê，有淡淡寧靜、孤寂ê感覺，而且我雨傘嘛用無幾擺，一時用著ê時，感覺真爽快。

    毋過傷過頭大ê雨嘛真予人感覺真困擾，彼種「愜意」ê feel 攏予破壞矣，原本是若冬粉般，彼種幼韌ê口感，雄雄變成無鹹纖ê烏龍麵，真予人感覺厭氣。希望每一擺ê落雨天攏是微微仔ê雨霎。

    但是天公敢若無聽著我ê心聲，我拄去第二校區上課ê時，猶閣是烏陰天，當我欲轉去宿舍ê時陣，忽然摔起大雨，真正足大--ê，袂輸銃子對天頂拍落來，彈佇厝瓦頂，phih-phia̍h叫，親像大道公咧做法咧。

    彼時陣，我ê腹肚咯咯叫，足枵--ê，只好想盡辦法轉去學生餐廳添飽腹肚，後來我腦筋一輾，馬上想著方法，彼个方法就是「媽祖隨香法」，鞋仔共褪落，襪仔嘛共褪落來，就按呢褪赤跤，行轉去。

    好笑ê是，當我ê跤婆踏入水窟ê時陣，大雨就漸漸仔變細矣，然後沓沓仔，沓沓仔消失佇空氣當中。我共家己講：「毋過Kuàn-tiong，無法度轉去矣！」因為我ê跤婆已經澹去矣，毋通佮香港跤跋硬--ê。

  你若問我敢會感覺真衰？我會講袂，顛倒是感覺懷念，懷念大甲媽ê日子，彼時ê狼狽模樣，一直存在我ê頭殼內，毋過真特別，並毋是所有ê日子攏會使褪赤跤大步行。彼日我回憶著值咧紀念ê經歷，所以我袂怨慼。