Hongtin Tsok-gia̍p bāng

        頂禮拜我去台中TIGER CITY 看街頭藝人表演。表演的人是一个二十一歲的少年人，伊叫做李科穎，專長是挵爵士鼓。伊對六歲開始學習挵鼓，一直練到今仔日已經有十五年阿，聽講伊不管時攏佇咧練習，坐車的時陣、歇睏的時陣、甚至是看電視的時陣嘛綴著音樂咧挵鼓。

   當然伊的技術會予看的人落下頦，手佮跤攏動了足緊的，是普通人的兩倍至三倍速度。毋過，看伊的表演，技術毋是上要緊的，重要的是伊的笑容。看伊拍鼓會使人真歡喜，主要的原因就是因為伊咧表演時，是一直咧笑，而且一直共觀眾互動，看的出來伊對家己的技術有真大的信心，規个表演嘛真有水準。

   可惜因為天氣的關係，伊干焦拍一點偌鐘爾爾。後來伊擱有表演踢踏舞，嘛算是予觀眾一寡安慰。

   看到伊舞台頂的表演，後壁是付出偌濟時間佮努力，才有這馬的成果。我越頭來反省我家己，就算無伊遮爾厲害，遮爾有才情，上無嘛愛有一、兩項會當當做家己專長的代誌。這是我一个新的目標，希望有一日嘛會當像伊按呢有自信。

附上他拍鼓的影片，逐家有興趣的會當看覓。

 http://www.youtube.com/watch?v=ZWh45xBRyH4&feature=player_detailpage