青春記事6-吳家瑜－Hongtin Tsok-gia̍p bāng

這禮拜，是我這學期上輕鬆的一个禮拜，所以我拜一去逢甲大學，一方面揣朋友，一方面踅街，結果看著一領真水的洋裝，而且擱足俗，我著買落來抑，轉去宿舍了後，朋友叫我穿看覓，結果我穿起來，怹攏講真好看，我足歡喜。拜二去看電影—志氣，這齣戲是咧講景美女中揪大索隊的故事，我和朋友佇戲院感動甲一直哭，實在真好看，內面，有一幕，予我印象足深，著是有一个毋是揪大索隊的人，罵揪大索隊的人真臭，袂曉讀冊擱愛亂，予我真無歡喜，每一个人，攏有適合伊做的代誌，雖然揪大索隊的人讀無冊，毋過怹攏真認真咧練習揪大索矣，我感覺這佮認真讀冊的人無啥物無仝，煞予別人看袂起，有一種真毋甘願的感覺！總講一句，這禮拜過甲真輕鬆，耍甲真歡喜，毋過紲落來，著有英語的戲劇、人文學院的歌唱比賽、演講比賽擱有學長學姊的歡送會的活動愛準備…。希望我會當甲每一項代誌攏做甲真好。