Hongtin Tsok-gia̍p bāng

學期咧欲結束矣，進前上台灣風俗ê課程，參加蓋濟ê活動，人講三月痟媽祖，干焦媽祖ê活動就參加袂少擺，毋過，我想這學期會使算是媽祖文化期，當中阮除了佇教室上課，抑有實際參與實物ê部份，較有實際ê感受。

    台灣ê文化百百款，逐項攏有伊ê特色佮信仰，我真歡喜咱系有台灣文化、風俗相關ê課，我認為這款ê課程較有意思。以早佇傳統ê教育方式內面，先生ê喙講甲喙角全泡，煞底袂過學生親身去體驗。

    咱定定咧講：「讀萬卷冊，行萬里路」實際上煞不然。課本所寫--ê，有伊ê道理存在，毋過有偌濟人確實了解伊背後ê意義？抑是共背起來，讀死冊？因為目前台灣ê教育主要是為著考試來讀冊，並毋是真心咧教育學生，如今才來出現「補習街仔」。

    佳哉大學ê教育風氣較自由淡薄仔，較毋免閣受著古制ê限制，予先生佮學生有較濟ê自由佮權利來學習事物，按呢才有才調共教育真正ê意義展現出來，予閣較濟人知影「人，為啥物愛讀冊。」

    自幼稚園讀到高中，我有影毋知我到底是咧創啥？是因為逐家攏佇讀冊，所以咱就愛綴人讀？抑是因為這馬大學普及，逐家相爭欲愛彼張證書來證明家己ê智識地位？可能猶有其他ê原因存在，只是真濟人攏毋知家己到底是欲愛啥？

    台灣ê教育若是會當予囡仔自細漢就選擇家己較有興趣ê物件，按呢學起來會較好，較有目的，毋是單單想欲考牢一个學位爾爾。毋過咱ê教育共咱講，高中以前遐ê科目就是欲予你產生興趣去學你所佮意ê物件。

    相信受過台灣教育ê人攏知影，敢真正是按呢？逐家心內有數。我毋是咧嫌煩台灣ê教育真䆀，只是感覺台灣應當有本錢佮才調予教育體制閣較完備、進步，重點是看在人欲做，猶是毋做，是用心咧做，抑是凊彩做做咧爾爾。