Hongtin Tsok-gia̍p bāng

囡á故事－匆pōng的阿飆

        阿飆是一隻孔雀魚，伊的個性真匆pōng,定定撞tio̍h玻璃。今á日阿飆甲以往仝款chông來chông去。伊看着伊的朋友阿肥，伊着問阿肥講：「阿肥，汝有心事嗎？若會看起來面憂面結？」阿肥講：「無啦！因為主人亦beh甲早頓送來，我腹肚足枵—ê」，着治chit—leh時chūn有一條紅紅的物件落落來，阿飆甲阿肥攏看着ah,阿肥感覺怪怪ê，伊隨甲阿飆講：「阿飆啊，汝beh感覺怪怪的嗎？普通時攏是咖啡色的，今á若會是紅色的？而且咱chit-má治水底，其他的魚á若會攏無食？」阿飆想一下甲伊應講：「哀，汝m̄免想hiah-nih-chē，既然腹肚枵阿着食阿，汝無愛食着煞阿。我是枵甲欲死，汝無愛食我着無客氣阿！」阿飆話講完o̍at頭着走去阿。

        阿飆若泅心內若想：「khong-khong,有物件m̄食，等beh食着食無。」阿飆開嘴食一條，食的時感覺怪怪的，阿飆想講應該是新口味，所以伊着繼續食。過無外久阿飆感覺腹肚治咧攪。當伊beh o̍at頭tńg去討救兵的時，伊看着阿肥雄雄狂狂的泅過來，大聲講：「阿飆，我知影he紅紅的是啥阿！」chit-ê時chūn,阿飆的腹肚已經痛甲無法度講話阿，阿肥繼續講：「he是新來的孔雀魚的屎啦！」阿飆聽着kui-ê面反青，暈去阿！