Hongtin Tsok-gia̍p bāng

頭擺讀著遐爾仔長个小說，真正予我有大開眼界、佩服之感，頭先老師塊分配同學上台報告个時，我著紲手掀對後壁--去，結果無掀無代誌，掀了才知影是遐爾仔長个一篇小說，彼個時陣我因為好奇心，著有內面大概看--一个，真正使人欽佩。

佇藍春瑞先生這篇無影無跡小說內面，有真濟特別个所在。第一，親像是逐段个開始，攏有親像七字仔四句連个開頭，大概先簡介續落來欲進行个劇情，予讀者有想欲讀落去个興趣；第二，這篇小說有二條主線故事塊進行。一條是描寫感情个，一條是描寫炭坑遐个故事。雖然有二个主線塊進行，但是二爿塊描寫个手路攏真頂真，完全攏無偏向任何一爿，看了有一種大快人心个感覺；第三，藍春瑞用了真濟真古典閣媠氣个台語語詞，老一輩个讀者讀--起來，會有一種親切感，若少年一輩个讀者讀--起來，會使來學習較純个台語語詞，真正是一篇誠好个文章。

看這篇文章，我感覺藍春瑞將咱台灣人描寫甲親像塊搬電影，看伊个小說著親像塊看電影遐爾仔真實！伊攏用一寡誠具體个語詞來描寫，予讀者攏有一種做戲悾、看戲戇个感覺，真正予人有一直想欲看落去个慾望！

雖然小說內面有寫甲較開放个所在，但是若無寫甲較有到味，這齣電影著無繼續搬落去个價值敢毋是？所以我是感覺毋管是愛情个描寫，抑是揣屍體彼段，若無按呢个描寫，相信逐家嘛袂想欲繼續讀落去，所以我是誠欽佩藍春瑞先生个文學手路！

看了這篇文章，我確實學習了真濟真古典个台語語詞，嘛增加我真濟台語語詞个能力，後面个解說我嘛會儘量來學習，來增加我台語寫作个能力！