close
張家的少爺
講到七字歌仔冊
實在毋知寫啥物
聽講動物是主角
也是毋知寫啥物
只好介紹阮小弟
今年拄好滿四歲
阮號伊作張迪迪
實在古錐無人比
伊的毛是長又白
目珠睨是圓又大
厝內懸低伊攏爬
房間客廳伊攏蹛
若是講到阮小弟
上濟動物通好比
請您聽我來說明
看阮小弟有外皮
耍起來著像猴仔
跳起來著像兔仔
歹起來著像獅仔
走起來著像狗仔
sai-nai時親像囡仔
唱歌時親像鳥仔
睏去時親像豬仔
其實伊是隻貓仔
白色長毛像皮草
青色目珠像珠寶
尾溜當做掃帚掃
是阮兜的一個寶
雖然伊是隻貓仔
我將伊當阮小弟
阿母將伊當千金
為何我講是小弟
因為實在太趣味
待我親身來解釋
小弟出世無一月
來到張家做老細
原本講是查甫身
阿母共伊當後生
誰知伊是查某身
真正未當按呢生
為何未當按呢生
因為名字已慣勢
阿母講就當後生
共伊當查甫來飼
有時阮叫伊千金
有時阮叫伊小弟
毋管小弟抑千金
伊攏是我上佮意
全站熱搜
留言列表