close
6月8日 天氣晴
感謝今仔日的好天氣，成全了阮的旅行……！
確實毌是頭一擺來美濃，會記持頂一擺來是幾仔年前的代誌！無為著啥，只是想講和厝裡的人出來行行，所以當中的過程當然無親像這擺這呢深刻，已經記了無偌清楚……而且，毌是有人講：「佮無仝款的人做伙旅行，就算是仝款的風景，嘛會寫出無仝的故事」?我想，我已經深深體會著矣！
美濃，嚴格講起來嘛是一个真有文化的古都，毌過，煞是意外的寧靜，無遐濟攤販叫賣聲，用清閒的腳步生活，予人閣較會當停落來沓沓仔欣賞遮个好山好水好風景！斟酌體會，會發覺美濃真正有一種「世外桃源」的清幽喔！
其實，我印象傷深的亦是美濃的彼粒大日頭和紙雨傘，尤其是佇透中晝的日頭跤，無是想欲食冰，就是想愈佇車頂睏……解說員到底是咧講啥?干若無這呢重要矣！若是講到紙雨傘，就閣較趣味矣！難得這擺會使有機會予大家發揮家己的創意，這一定是真濟人頭一擺的體驗！看到大家雨傘的色水是一个比一个閣較媠，敢若甲伊當做寶貝仝款，先莫管畫圖的技術到底好無，這絕對比櫥窗內底放咧賣个閤較有意義！
講實在話，人生敢毌是按呢? 透過一擺旅行，一場演講，亦是一條歌，一首詩來改變家己的知識，增長家己的智慧? 毌管未來會有啥物款的意外，我攏期待下一擺的旅行會使得到無仝款的人生經歷，這應該就是課本內底無教，毌過人生中不可欠缺的！
全站熱搜
留言列表
