Hongtin Tsok-gia̍p bāng

這陣系上真無閒，為著欲予學長佮學姐有美好的回憶，逐家攏真認真咧準備活動，阮班嘛是，希望阮跳的舞會當予in有真濟笑容。除了系上的代誌以外，我感覺上有壓力的是社團的代誌，下學期我接慈青社的社長，這是一个足重要的工課，我足驚我會予社團的學長、學姐失望，為啥物我會按呢想？因為親像這學期我就有足濟活動攏無參加，毋是因為愛做工課，就是予系上抑是作業影響著，所以我感覺我無資格做社長。毋過學姐共我講我是in佮陪伴阮的阿爸、阿母（慈濟的師兄、師姐）討論了後，感覺上適合的人選，這聲我的壓力閣愈大矣！阮小妹聽我共情形講煞了後，伊講一句話：「假使你若無彼个能力，人是無可能揣你來做社長的，阿姊！你一定有法度，愛相信家己！」我聽了是真感動無錯，因為伊遐爾支持我，毋過另外一方面我真正足懷疑，第一擺的挑戰，毋知是毋是會像每一个鼓勵我的人所講的按呢遐爾順利。

我這个人是彼種真佮意共代誌攬佇身軀頂，然後共家己舞甲足忝的，講較好聽是真負責任，較phái聽是無信任別人，希望我會當學共一寡代誌放落來予其他的人分擔，較濟人做代誌嘛較緊完成。

雖然辛苦的代誌有真濟，毋過嘛是有好消息！期待足久的師資生錄取名單總算出來矣，足歡喜我有考tiâu，而且我申請專長的課程嘛有tiâu，真正是真幸運。歡喜的另外一方面是憂愁，足驚我會無閒到睏袂好勢，毋過若是時間安排妥當的話，莫一直看電視、耍電腦，我大二的生活應該是會足充實。「雖然路無像所想的遐爾好行，但是有試有機會。」共心內的壓力化做挑戰的力量，往好的方面去想，閣會記得 國中的 老師共我講：「成功是留予把握機會的人。」我愛感恩學長、學姐予我這个機會來提升家己。