Hongtin Tsok-gia̍p bāng

今仔日是這門課ê期末考，結果我煞睏過頭去，因為手機仔無電，我嘛袂記得充電，所以鬧鐘著無響，唉，後擺千萬愛注意！其實我最近定定leh想，我到底讀這是欲做啥? 講實在，我雖然毋是講真討厭學這，抑不過，我嘛無講對這真有興趣，假若只不過是選一個國立ê大學來讀，因為大人lóng講：一定愛讀冊才有路用。我嘛無知影甘真正是按呢，我只知影我親像一個無想法ê空殼，人講啥我著去做啥。表面上是順爸爸媽媽ê意，其實我根本著無知影我家己欲有啥款未來，真恐怖。

昨暗是肉粽節，所以阮兜佮大部分的人仝款，規家伙仔嘛有食肉粽。毋過較特別的是，每一年這个時陣，阮爸爸攏會開車去淡水的水源地貯「午時」水，伊佇我細漢時就有佮我講，這个時陣的水是上特別的，佮普通的水無仝，有真濟能量。所以貯好水了後，伊就會用面巾沐午時水予阮拭拭阮的面佮阮的跤手，彼種感覺實在是有夠爽快的！

雖然今年的肉粽無佮以前仝款是規家伙仔去遐貯水耍水，但是我嘛是足歡喜，除了有用午時水拭身軀，猶閣有想著細漢時無煩無惱去四界𨑨迌的回憶。

這禮拜二下晝台語系的系學會開系務大會,為著系學會的改革做決定,集合著全台語系的所有人,毋過彼工無全部的人攏到,可是我感覺系學會欲做的改革誠好,為著予台語系閣較好,實在誠用心.

賰兩禮拜就欲放暑假矣,我實在是誠期待,希望會當佮以婕做伙去誠濟所在thit-thô,去參加台灣的民俗文化的活動嘛誠好,例如講:基隆辦的中元節普渡,義民祭,台南七夕做十六歲的文化,頭城的搶孤,放水燈等等,今日阮討論甲誠歡喜,攏誠向望暑假緊來,可是愛先共期尾考考好.

    時間真正過了足緊的，經過學長佮學姊的送舊活動我才體會的這个道理。學長、學姊的送舊活動予我是感動閣悲傷！想著遮爾照顧我的學長佮學姊就欲離開，目屎就是流袂停。毋過，若是想著過去這一年佮學長、學姊的快樂回憶，心情就會歡喜起來。

    而且，這禮拜我閣有一个真好耍的生日。因為生日彼工拄好嘛是系排送舊的日子，所以我今年的生日真正是足鬧熱。系排內底的大家做伙替四年仔的學姊慶祝，嘛祝福學姊未來會當過了順順利利、幸福快樂。過程有快樂的、趣味的，嘛有悲傷的、予人流目屎的，遮攏是因為阮對學姊的敬重佮佩服。阮攏希望學姊會使thsuā著歡歡喜喜的心情對這間學校畢業！

    昨日，是端午節，因為熱天的下晡通常攏會有陣雨佮霆雷，端午節一工當然無例外，台中落真大的一陣雨，所以阮兜著取消計畫無出門，聽阿母講，只要端午彼工落大雨，彼年著會有大豐收，希望會當像阿母講的按呢，予農民有好過的一年，六月底矣，一學期閣袂結束，想起學期初閣怨嘆作業真濟，逐週攏愛寫青春記事，無想著竟然寫物件會變作一種習慣，沓沓仔青春記事著來到最後一篇，上大學的這一年我嘛學著真濟、看著真濟，我從來毌曾想過我的生活會變作這馬按呢，我想遮著是計畫永遠趕袂著變化，這馬的我真滿足，嘛感謝出現佇我身軀邊的人。

拜一上體育課ê時，老師設計一个活動予阮逐家會使練習拍球閣會使得著予伊請飲料ê機會，伊佇發球考試分數滿分ê所在用羽毛球排了一個塔，然後阮愛佇規定ê發球所在開始發球，若是拍著伊排ê羽毛球塔，就算阮贏矣！雖然老師因為我是體育委員有予我較濟機會，猶毋過我攏無把握著，逐擺我攏拍著羽毛球塔ê邊仔，真正真可惜！最後雖然我無趁著飲料，毋過我嘛是耍甲真歡喜嘛運動了真濟。二年級ê時陣，阮會家己選擇想欲上ê體育課，我猶閣咧想是欲繼續選羽毛球課抑是愛選佇阮班真濟人攏真有興趣ê瑜珈課。

今仔日是禮拜二，暝仔載是五日節放假一工，無拍算轉去花蓮，所以決定去嘉義tshit-thô，對台中騎車道到民雄，實在足忝，啊無過若是佇嘉義無機車會足歹耍，最近有一个風颱，好咧佳在嘉義出日頭，而且閣足熱，嘉義其實無啥物好耍，啊無過好食的東西誠濟，咱上主要就是去食物件，佮高中時的朋友見面，講高中的過去，雄雄感覺人生好親像就是按呢，攏咧和較早的朋友作伙數念過去，才知攏轉袂去了，定定攏在想若是較早的朋友到這陣攏閣作伙上課，這馬的生活會較好bò？

因為之前共飲料盒仔洗洗下，囥佇外口想講共曝予焦，明仔日才共提去擲，想袂到糾察認為我烏白擲糞埽，了後開我一張違規的單仔，愛我佇限定的時間去消除，我想講時間強欲到矣，所以今仔日著去消規，結果做甲有夠忝，共宿舍1樓到3樓全部掃一遍，閣愛洗1樓洗手台，閣愛拭一樓的桌頂佮椅仔，閣愛去共1樓到3樓的浴間仔的頭毛全部清掉，閣規定講一定愛做2點鐘，提早做了嘛袂使揣糾察檢查，結果我提早做了閣與糾察叫去做別的代誌，橫直一定著愛2點鐘，後來我規氣做了著佇房間等到2點鐘過去才去揣人檢查，我想我以後甘願盒仔攏不愛洗，我嘛無想欲閣去予人開單

    有時陣，人真的會頭殼歹去，當你沉佇咧一項代誌的時陣，你著會做出你平常無可能做出的代誌，我想起我以前高中的時，真迷看小說，我定定乘勢我暗時咧睏的時偷看小說，有幾擺我攏會看甲停袂落來，著會看甲天光，歸暝攏無睏，去學校上課的時著會足艱苦，因為足想欲睏，毋過我嘛知影我是自作孽，袂使怪別人。

    今仔日，傳統戲曲課的TA共阮講，下一學期的文化必修課愛交的作業，有兩種，一種是參加民俗活動，一種是家鄉記，兩个攏真麻煩，猶未二年級著感覺課業壓力足大，我攏愛好好準備。

5/21彼工暗時是唱歌比賽，我真想欲看全部人的演出，毋過因為愛練習跳舞，所以干焦欣賞著台語歌比賽的部分。咱班的瑛娟實在是真gâu，伊的歌聲一出來我著起雞母皮矣，足有感情的，唱到我的心肝頭去，雖然伊無提著第一名，毋過伊是我心內的天后。咱系的學姐攏真優秀，瓊誼學姐唱江蕙的「半醉半清醒」，我感覺對感情mài計較是一件真困難的代誌，因為人攏是貪心的。「心塊半醉半清醒，自己最明瞭。」佇愛情內面受傷，有當時講出來別人嘛無一定會了解，毋過一定愛想會開，愛對家己較好的。
    怡寧學姐的歌聲實在真好聽，「梳妝台」內面有一段歌詞「一疊的舊相片，藏佇屜仔內，若無打開，阮哪會知，原來青春的愛，是遮爾精彩，就算已經過了偌濟年代。」若是mài看規條歌的意思，干焦看字面上的意思就好，會有真深的體會。這寡參加比賽的人，就算足久以後，這工的體驗、唱歌的感動，一定會予in的人生閣較精彩，當然做觀眾的阮，這工的演出對阮來講會是真美麗的回憶。

拜三因為是五月節，所以放假，因為無想欲一直踮佇房間內底，所以我佮朋友決定欲作伙去一中遐ê漢堡王讀冊，無想著才拄到遐無寡久，就開始落大雨，等雨變較小了後，阮決定先去光南踅一下，物件買煞才閣去讀冊，卻無想著，遐ê漢堡王竟然拆掉無開ah，佇無法度ê情況之下，阮只好先去食飯，所以就先去中友百貨公司食飯，後來又閣買指甲油，毋過昨昏歸工，天頂攏烏陰烏陰，一直咧落雨，時大時小，猶毋過，我決定以後偌是閣欲去外口讀冊，一定愛先知影彼間店有開無，昨昏雖然誠忝，毋過嘛誠歡喜，因為阮買誠濟物件轉來！

青春記事12

  這篇青春記事是這學期最後ê一篇，佇再過了兩禮拜以後就欲愛考期尾考矣，大家攏真認真佇咧準備考試，我想我嘛愛開始準備矣。這禮拜六就是學長、學姊ê畢業典禮，我想到三年了後阮嘛是愛拄著這款情形，我就目眶紅，今馬大家相處攏真好，實在無想欲分開!加油!105級tâi-gí- hē！！！

這个肉粽節放假佮朋友雄雄決定欲作伙去台南耍,因為完全攏無先計畫,

佇路上才臨時決定欲去走馬賴度假村耍,想袂到汽車ê導航一直阮

    我頂禮拜六佮朋友去萬代福戲院看電影，彼个電影是「大尾鱸鰻」，其實我看這部電影是免錢的，因為我的電影票是抽獎抽著的，聽講這部電影佇過年拄出來的時陣，有誠濟人去看，佇彼時陣我嘛足想欲去看，毋過，過年有真濟代誌，所以無時間去看，好佳哉有這擺的機會，所以我感覺我家己真幸運。

這禮拜二因為無課,所以我禮拜二就轉去厝裡底了!禮拜三是端午節,有划龍舟和吃肉粽參掛艾草的習俗!因為禮拜三咧落大雨,所以我無去看龍舟的比賽,猶毋過我肉粽就吃了兩粒矣,真的是足滿意阿,因為是外嬤親手包,所以特別好吃!

閣來,欲考期末考了!要好好準備,袂當像頂學期予當掉!

這个禮拜佮朋友去唱歌,真正足歡喜,因為期尾考就欲到啊,

這擺每一科愛考ê物件真正真多,所以壓力馬是愈來愈大,

         已經有差不多兩个月無轉去厝啊！真不簡單kap所有ê代誌做了，總算會當轉去，拜五下課，我就趕緊轉去寢室收物件，提著大包細包上火車，三點鐘後，我已經到我日思夜念ê高雄啊！拜二ê時陣，是形象大使ê社員大會，阮愛選新ê幹部出來，予我想袂著ê，是我竟然予人提名而且選著活動部ê部長，這一方面予我感覺歡喜家己ê能力予人肯定，一方面予我感覺小可仔煩惱──因為二年仔ê課業會變較重，而且我已經是響鼓社ê幹部啊！一年仔就遐邇無閒，毋知影二年仔是毋是會無閒到無法度睏？

台灣史的課程中，老師放｢牽阮的手｣予阮看，佇影片內底，田媽媽是一个勇敢追求愛情的人，伊熱情的個性嘛用佇社會運動頂，伊佮田醫師為台灣付出真濟心力，怹無佮意國民黨無自由擱恐怖的統治，所以怹用怹小小的力量幫助一寡無辜的政治犯，比如陳菊女士，施明德先生，等等，毋過，鄭南榕先生自焚的悲劇擱有林義雄先生的媽媽佮查某囝的性命怹嘛是無法度挽回…，田醫師最後的人生是佇病房過完的，田媽媽講伊感覺田醫師一生攏過了真無歡喜，所以伊希望田醫師去到天頂會過甲較快樂，予我看共哭出來。雖然田醫師的一生可能過甲真辛苦，毋過會當有遮爾好的牽手而且擱會當同齊為台灣拍拚，一定是伊感覺上幸福的代誌。看著遮个社會事件，無一項是我參與過的，我感覺怹真偉大，嘛真感謝怹的拍拚，予我會當佇一个自由的台灣，平安大漢。