Hongtin Tsok-gia̍p bāng

頂禮拜我有誠濟代誌佇同一咧禮拜,有社團ê送舊,閣有錄音ê作業,閣有戶外教學,愛去九天民俗做體驗ê活動,閣有社團ê成果發表會,愛先來講一下社團成發,咱花了誠濟時間去準備,彼一工,咱中午去九天民俗活動,騎車到東海那邊,其實距離有淡薄仔ê遠,然後,九天民俗活動結束了後,咱又立刻騎車回學校,準備社團的成果發表會的場佈,實在是足累矣!抑毋過,為著成果發表會,為著來佮咱加油鼓勵ê人,咱嘛袂使覺得累,好家在咱的成果發表會足成功,逐家攏足歡喜阿!咱可以講說是圓滿落幕阿!

    畢業典禮是學校大型的重要活動之一，佇這一工，阮攏會規團出勤，佇學校每一个所在出現。

    我今年的任務佮去年仝款，攏是徛佇中正樓頭前，主要是向家長說明阮畢業典裡的排隊方式；當中正樓內底無位以後，變成是愛「擋人」，向家長說明中正樓內底已經滿啊！愛請伊去備用的會場看實況的轉播。

　　頂禮拜四下晡，茂賢老師安排阮班去九天民俗技藝團本部做體驗，因為我驚講到時陣會揣無路，所以頂禮拜二暗時我閣特別先去揣路，落尾閣順紲看夜景。

期尾考欲到啊，真濟教授、老師攏開始出期尾作業kap報告，真恐怖的是全部攏佇後面才講有一個作業，一科沒打緊，上離譜的是每一科攏來一的作業，加總起來數量真大，又閣愛集中佇上尾仔這陣考試，壓力不哩仔大，毋過這著是學生的生活，我嘛習慣啊，真正愛較打拚一寡，沒著會予辛苦飼阮大漢的爸爸媽媽失望。

6月12號是今年的五月節，一透早，媽媽就已經攢好足濟物件欲來拜祖先矣，拜完祖先了後，中晝12點的時陣，我就𤆬弟弟同齊去洗身軀。五月節的這工，嘛是阮阿媽舊曆的生日，所以下暗，逐家作伙去幫阿媽慶祝，阿媽就佮阮講起以前的代誌……。

    對這禮拜開始，總算是會當專心讀冊囉！兩个社團的代誌攏告一段落矣！系內的代誌嘛攏差不多結束矣！我欲開始足認真足認真讀冊囉！希望期尾考的分數袂傷歹看！
    這學期上尾的一件代誌就是鐸聲合唱團的送舊活動，雖然講阮合唱團欲送的長學姐無蓋濟，毋過阮每一个人攏挈出百分之百的氣力歡送學長學姊！希望予in有一个足美好、快樂的暗時，而且閣希望in會當懷念當初這个摻大家作伙打拚鐸聲合唱團，有閒的時陣就定定轉來共阮看！

       最近一直咧趕報告，猶閣有看冊、背冊，有一寡仔是家己造成的，毋過有真大原因是因為欲歇熱矣，全部攏積積作一伙，代誌是愈做愈濟，半眠1、2點睏是定定有的代誌，毋過對我來講，這根本著毋是正常的代誌！睏無6點鐘著愛開始面對足濟代誌，根本著睏袂飽，最近早起起來，心情無偌好，到學校面對同學實在是笑袂出來，只好面臭，對朋友真拍謝。

    有的物件閣是愛和別人合作，愛趕時間、別人做毋好閣愛家己做一擺，增加家己的空課佮負擔，實在是足沗的!真正希望我會當佇這禮拜提早做好應該做的代誌。

    『食』在予人袂安心，最近新聞常常講著『毒澱粉』的事件，予人聽著就驚驚，真濟食物攏有問題，黑輪、豆花、芋圓、粉圓、肉圓、「布丁」遮等等的食物，予人感覺這馬食物件實在袂放心，前一陣仔，我才拄好共「泡芙」食入去腹肚，煞佇幾工後，看著真驚人的新聞，原來生理人用過期的原料做「泡芙」，害我驚著，心情無法度用文字來表達。

　　真緊這學期就欲結束，做大學生的時間越來越少，一時仔就欲畢業然後揣頭路，回頭看家己不時咧跋倒，摔一擺就愛開真濟時間爬起來，自從開始讀冊到這馬，國小、國中、高中、大學，每一擺攏有無仝的煩惱佮挑戰，有當時會使沓沓仔來，有當時趕緊解決，壓力有時大有時細。

　　人生最後輕鬆的一个階段咧欲結束，未來要愛佇的是佮這馬完全無仝的人、代誌，是人生另外一个階段，面對按呢的事實予我真大的壓力，希望會使逃避，毋過這是無法度去閃避的代誌，因為我已經是大人，雖然毋知愛面對啥物困難，拍拚過去就好。

6月8日 天氣晴

    今仔日透早我佮圖書館的學姊出去耍，阮佇學校的司令台會合，學姊攏欲畢業矣，所以阮一陣人約出來耍一寡細漢時陣耍的123柴頭人、摩斯密碼+真心話大冒險、打彈珠…等，阮攏耍甲真歡喜，阮嘛翕真濟相片，每一个相片攏足好笑，有假做豬、嘛有金雞獨立，抑閣有真濟真濟好笑的動作。我咧tshit-thô 的時陣無注意，跋一倒跤頭趺遛皮流血，彼陣毋知影疼，因為傷過歡喜，所以閣繼續佮學姊耍(轉來才知影疼)。       中晝的時陣阮做伙去食飯，我嘛佮學姐變甲足熟，我真歡喜會使閣熟似遮濟學姊。阮開講，講阮佮意做的代誌、佮意的電影(佇遮推薦一部電影「尖叫旅社」，是足趣味的一部電影)，阮有真濟話題。                                                                             阮食飯了就散會，我心內有淡薄仔毋甘，因為我佮in熟似傷晏，in咧欲畢業矣，in畢業了後就會轉去in家己的國家矣。毋閣我想，我會使佇畢業進前佮in熟似，遮嘛是ㄧ種緣份，我會珍惜這份情，共in寫入我的生命路程之中，有in所以我的生命是豐富的。我真歡喜我有這个榮幸會使熟似in這陣古錐的學姊。

學期咧欲結束矣，進前上台灣風俗ê課程，參加蓋濟ê活動，人講三月痟媽祖，干焦媽祖ê活動就參加袂少擺，毋過，我想這學期會使算是媽祖文化期，當中阮除了佇教室上課，抑有實際參與實物ê部份，較有實際ê感受。

這禮拜的重點這是送舊晚會，雖然講這擺的晚會的準備有一點仔趕緊，因為阮是佇咧晚會的前四禮拜才開始準備，彼的時陣真正是攏驚到皮皮剉，足驚無法度佇咧六月四號以前將活動練予完整，嘛足驚會佇舞台頂面見笑；毋過，因為阮逐工的準備參無眠無日的練習，到晚會彼一工，阮將上好的一面表演予欲畢業的學長學姐看，學長學姊嘛攏與阮足大的鼓勵~各位學長學姊，畢業快樂喔!!!

　　6/4禮拜二，對我無什麼意義，但對大四ê學長姊，卻是意義非凡，今晚是in送舊晚會，大學念了四年tsit學期過了後，就是in起飛ê日子，看tio̍h一段一段ê表演，學長姊有笑聲，有目屎，我想tio̍h，我mā只tshun兩年，應該koh-khah beh好好á把握，創造koh-khah chē ê回憶，tī兩年了後ê tsit-ê時陣，會當看tio̍h當初ê自己，發出歡笑聲，留下叫做不捨ê目屎，tshun落來兩年，完成畢業門檻，好好á講台語，koh-khah充實家己，是現在ê目標，我beh踏出去ē-tàng對人講我是台語系畢業ê。

這禮拜是阮期待足久的送舊晚會,阮的主題是酒店,所以大家攏愛穿佮俗擱有力,來參加的學長姐穿的是一的比一個擱卡好看,為了這個晚會,阮開了足濟時間準備,希望學長姐有感受著阮的用心,看著in以前的照片,想到阮過二年嘛愛離開這個大家庭,其實佇大一的時陣,送舊時沒啥感覺,因為攏無啥物人熟識,但是這擺攏是真好的朋友,看著In欲離開真正足毋甘,希望in以後會當揣到好的頭路,有好的前途,轉來佮阮見面,阮的籃球隊因為In的畢業嘛有可能因為人數無夠愛解散,真正有淡薄仔傷心

這禮拜阮妹畢業矣，實在是太過份矣，我著猶袂歇熱咧，伊那會當先比我較早放人!!我敲電話去共講，伊竟然涼涼的講，拜託下我閣等到你歇熱，我從來毋捌看一个大學佮國小仝時間放人，連阮學校沒畢業的學生攏比恁較早放，聽講你拜五有課哈哈哈哈好好的讀矣！我聽一个真凝，著共講聽講你七月愛考指考，你好好考矣，緊看冊毋是有人講袂讀台北大學？歸氣共我來讀台中教育大學拉哈哈哈！！！阮小妹搖頭：我才袂去共你讀仝間學校，若真正這不幸，拜託你住路上mài共我講話足sià- -ê，好啦電話愛錢我先掛斷！我：喂喂喂！！！！逐擺攏先予伊早一步掛斷電話！！

一年一度的送舊活動圓滿落幕，看著系上人才輩出，表演唱歌跳舞逐項攏予人呵咾甲會觸舌，家己嘛覺得足歡喜，猶毋過，煞有一件代誌無應該就按呢恬恬予人放袂記，系辦阿姨為啥物會這呢自私，對咱系上的同學就煞仔，這仝是對著佮咱系上合作的廠商，當著規个台語系同學的面前，問講:「阿恁是擱愛外久才會好，我佇欲關門阿呢!」備料的阿桑予伊按呢問嘛毋知欲按怎回答，講廢話，為啥物伊袂曉替人想，人的工課就是愛傳食物，伊直接講欲關門，但阿桑也毋知影有另外一邊門會使行，阿姨其實會使共主辦抑是會長講就好，這攏是有法度解決的問題，予伊按呢舞弄，辦活動的品質真拍損。