斑芝棉
大家好！我是阿芝，今仔日我欲來紹介我家己予大家，恁一定足想欲知影我是啥hoon？唉呀！我想恁百分之百攏有聽過我的名啦！因為我著是“頂港有名聲，下港有出名”的「斑芝棉」阿芝，ooh！拜託你莫共我講你毋知「斑芝棉」是啥！好啦！我知影大家攏較慣勢我華語的名「木棉」，但是請恁uì這馬開始稱呼我作「斑芝棉」阿芝！因為我阿芝的“芝”著是uì遐來的，所以我較佮意彼的名喔！
我所蹛的所在著佇咧台中足有名的台中教育大學內底，阮兜著蹛咧台灣語文學系系館後壁，也著是美教系系館的頭前。阮厝閣有我阿爸、阿母，雖然每一工攏只會當佮in恬恬的徛咧遮，但是我一寡仔攏袂感覺著無聊，因為我有真濟好朋友會不時參我開講佮tshit 迌。毋是我愛講，這間學校正經細甲三分鐘著踅的了，但著是因為按呢，予我真輕鬆著會當熟似遮內底的所有鳥隻，in逐工攏會共我講學校每一個所在發生的代誌，有時陣閣會佇我的身軀頂跳舞、唱歌予我聽，佮in作伙正經足快樂的呢！
若是鳥仔攏轉去in兜的時陣，我仝款袂無聊，因為我會當看經過阮兜來來去去的學生in咧做啥物。我上愛看欲遲到的人uì後門雄雄狂狂的 tsông 入來，佇彼時陣我攏足想欲創治in一下，共我的跤伸出去害in拔倒。但是有一工我忍受袂牢這個想法，並且正經按呢做，予一個學生摔一個蹛院蹛阿歸仔工，我的阿爸佮阿母實在是有夠受氣的，因為彼件代誌了後，我的所有親情著予上天處罰袂當共阮的跤伸出土底，而且阮的身軀頂閣生了足濟足濟真bái又閣鑿的肉瘤，予所有的人攏變甲足奇怪，學生仔嘛攏毋敢來到阮生邊佮我tshit 迌。唉！我實在足後悔我彼時陣哪會遮邇毋捌代誌，害阿爸、阿母、閣有我所有個親情攏變到佮我仝款！毋閣話雖然按呢講，我猶原佮意看學生遲到！佮以早無仝的是，我這嘛一點仔攏袂想欲害人拔倒，因為我正經知影我毋著矣！
這嘛我想欲做的是趕緊大漢，會當身作佮我阿爸阿母仝款懸閣仝款勇！而且生足濟我的後一代，予in佇咧落雪的時陣，綴咧白 phau phau 的雪作伙到土跤頂，嘛予大家了解，毋是只有油桐花是五月雪，阮落的雪比in嫷濟矣！我想欲予歸的草地上攏是我的囝仔，因為我想欲用這個方式來救地球，嘛想欲用這號方法來彌補我細漢時陣的過錯，希望上天會當原諒我，共我的親人攏變返--來！請恁相信我！我一定會講的到，做得到！我的紹介著到遮，感謝大家。
修辭:類疊、轉化、呼告、引用、誇飾、感嘆
留言列表
