Hongtin Tsok-gia̍p bāng

小大地­__汪子由

日頭猶未出來，風中已經傳來鳥仔歡喜的音符，漸漸仔，草螟仔的聲變做念經早課的尾語，幻化人間的煙霧。

樹稏新生，親像紅嬰仔咧tin動，微微仔笑，看著親愛的阿爸強烈伸出溫暖的雙手共伊抱，風小姐，刁工共伊創治，有時抓有時捏，共伊創佮笑咍咍，尾手愛睏閣共伊搖！

土地母親已經換穿新衫，一身軀又閣紅又閣粉又閣有碧綠草葉來做底，頂面彩蝶飛來去替伊捋頭髮，suí噹噹妝予紅嬰仔看佮笑面笑面，目稠圓liù-liù換作幼瞇瞇。

這同時，自空中tau3-tau3- -a灑落來金si̍p-si̍p葉阿姐，直直繞圓箍仔咧跳舞，可能是太歡喜，尾後踅到母親懷中才知歇睏，可愛的模樣予老樹阿伯笑佮傳出「嘶--嘶--嘶」的聲音。

中晝時，食飽愛睏的松鼠已經爬佇樹枝之間盹龜，風小姐著會行來，就細細聲唱出美妙搖籃歌仔，唱予大地萬物涼意、唱予逐家睏到夢鄉。

一過中晝，傷愛鬧熱的栗鳥仔著飛到樹仔身軀邊，一面開講，一面叫醒身軀邊的人，教伊作陣來開講，這時陣的大地，又閣吵鬧起來，吵出大地的活動力。

日頭淡薄仔痶矣，佇山巒後壁倒落睏去時，月娘著出現矣！月娘是大地的暗時的乳母，tshuà著伊幾若百个助手，登門造訪來照顧伊的囡仔，月娘揣草螟仔佮伊做伙的晏友，開一場予暗暝的演奏會。表演有時兩部和聲是為囡仔較好睏；有時sian尪仔也有加入獨唱，唱出暗時做khang-khuē人的辛苦，共遐的人鼓勵，予聽了最後的主持人月娘聽佮也微微仔笑，提起雲紗一步步行出這舞台…

修辭：譬喻、轉化、白描、象徵、類疊、映襯