怎樣的心情，流下這款m甘的目屎？
彼工，經過你的身邊。秋天將你身後樹頂的葉仔吹凋；葉仔，一片一片，脫離原生的所在。你眼中的目屎是落袂完的葉仔，一滴一滴，順著你乎日頭曝烏去的面，惦惦仔流，惦惦仔ta。彼個下晡，坐佇你身軀邊，聽你講古，講世事變化，講心情，一直到日頭落山，天色沓沓仔暗。看著面憂憂的你，我想起高中時，國文課本內底遐永遠背袂煞的古文。背冊，偌像跋落暗暝彼个噩夢；睏袂去，嘛醒袂過來。彼時陣，對你是恨，恨你一个查捕人為何即呢厚話，苦毒阮青春單純的心；這má，對你是m甘，m甘看到兩千年後的你，猶原孤單，一个人站佇運動埕邊，一瞑過一瞑，m̄敢離開一腳一步。面頭前，總是人來人去，花開花謝。
校長講，這个學校， 佇傳統的爐內炕過頭。炕到冊嘛無滋無味，焢到課本頂的漢字攏攪做夥，看攏無。改名，是為舊相的校舍翻新；翻新了後，沓沓仔等待新蘡的春天。轉型，是為的追求『社會達爾文主義』的夢，期待一个蛻變的時機。追求流行，總是一貫的人性。如今，學校內四界攏是流行下的半仿仔；一時仔是時尚的「Art Deco」，一時仔是復古的「Gothic」，鬥陣將睏去的校舍吵kā鬧熱滾滾，只是佇這袂閣聽到讀冊聲。時代永遠嫌你的腳步慢吞吞，tè袂著『阿姆斯壯的腳步』；嫌你『之、乎、者、也』講袂煞，儒學彼套過時兼無聊，閣不如越頭去聽「RAP」，也是學陶吉吉唱「R&B」。
教育部長講，去「中國化」是國家施政的方向，去「古文」是教育部百年計畫。簡單來講，You are fired! 干單教育部長敢辭你的頭路，而且免錢送你雞頭。怨嘆、無奈攏無效；佇兩千年前，你早該看破道德難成。千辛萬苦渡海來台，準做找到一个收留你的所在。誰知，一世紀的契約猶未到期，教育部長兜愛你點清、結算年資，做一尊閒閒無代誌的老公仔標。歸工面對散步的人憨憨仔笑，笑閣嘴鬚攏拍結，做一个世界尚老的服裝『模特兒』。
人前，微微仔笑；人後，心酸誰人知。m願離開，嘛放袂落對這塊土地的愛；感情親像土腳拋藤的樹根，纏你纏kā ân-ân，纏著喘袂出氣。講袂出的無奈，沓沓吞腹內。目屎拭袂凋，落葉陪你一眠lim乎乾，醉到無眠也無日。你的心情、你的目屎，乎我了解著你目睭內滿是的憂愁，總是放袂落，離袂開。天暗了後，你的一生干單剩《論語》短短兩个字。暗眠，猶原站佇遐，一个人憨憨仔笑。樹頂的葉子惦惦仔落，你的目屎沓沓仔流。
◎修辭法：譬喻、排比、摹寫、借代、類疊、鑲嵌、類疊、轉化
留言列表
