close
頂禮拜六，我佮同學─禾鈺去看戲，彼是老師向阮推薦- -e，老師佇咧介紹這个劇團的時，就有放in進前bat演過的戲予阮觀賞，彼當陣就感覺真特別，因為這是我第一遍看著人現場講台語咧演戲，閣佇公開的舞台頂正式演出，內容嘛真心適、趣味！通常會佇正式的舞台頂懸演戲的攏是講華語- -e，罕得有像按呢講台語咧演一部戲，實在令人感心，因此我佮禾鈺就相招去看in這擺的演出，這擺欲演的叫做「浮浪貢開花」。
伊的名予人看袂出來到底欲演啥物，我知影「浮浪貢」是毋好的意思，「開花」通常攏是講好的物件，所以我想大概是咧講對歹變做好的故事；這擺的戲仝款是真心適，但是劇情有淡薄仔普通，予我小可仔失望，毋過演員佮幕後的工作人員是足辛苦- -e，所以愛好好鼓勵佮呵咾，煞戲了後阮走去佮演員握手、翕相，逐个演員態度攏足好，禾鈺閣佮藝人「曾心梅」翕相，歸个講起來彼日是真值得紀念的日子！
全站熱搜
留言列表
