日時普通的外表，毋知你予偌濟人踏過；頭一擺甲你見面的時，是四冬前的九月天，彼陣，猶毋知你特別的所在佇佗位，反正就是一條人行道啊！逐工攏會行過一條普通的道路爾！
彼工，腹肚食飽飽，逐家相招欲去散步，人地生疏，只好就佇學校外圍散步，行咧行咧、、、、、、，「你看你看，這條路哪會遮súi！」「嘿阿！爍咧爍咧，足sîng銀河。」阮逐家看著平常時這條看起來普通普通的人行道，攏毋敢相信，天一暗，邊仔黃色的路燈照佇伊的身軀，是你穿一su禮服欲去參加晚會的時陣，歸身軀金爍爍,是逐暗上SÚI的女主角；人行道，有時塊流目屎，惦惦佇暇，一句話攏毋講，就按呢，目屎一直流一直流，電火照著你的目屎,看起來金爍爍,予人足毋甘！就因為你看起來金爍爍，所以阮逐家就決定甲你號做「銀河」！這時陣，阮感覺「銀河」愈來愈金矣!可能你有聽著阮幫你號的名,嘛真佮意這個名的款!
「喂！咱今旦日閣去行銀河好無？」，了後，只要逐家暗時食了傷飽，阮就會相招去行銀河，去惴你，一個人無聊的時陣、想厝的時陣、感覺孤單的時陣，天色暗矣，就會想欲去惴你，看起來總是金爍爍的你，心情不好的時陣，看著你，就會想欲大聲吼；心情好的時陣，看著你爍咧爍咧，原來是塊對我笑；感覺孤單的時陣，看著你爍咧爍咧，就聽著你塊甲對我講：「無要緊，猶閣有我，我會甲你攬咧！」，你是朋友、是親人，雖然一句話攏無講，毋擱看著你總是會予我安慰！
彼工，暗頓食了，阮六個人作陣去散步，天氣真好，甲日時熱烘烘的溫度相比，這馬這種溫度tú tú仔好，風輕輕的吹，吹過面、吹過身軀，阿！這種感覺予人感覺真爽快，若是逐工攏會凍有這種感覺就好矣，煩惱的代誌、無歡喜的代誌就隨這陣涼風吹去天邊海角，永遠攏麥轉來好矣！這種感覺閣加上黃色的路燈照佇銀河這條長長的人行道，今旦日的你看起來竟然有淡薄仔浪漫，予人感覺真幸福！犯勢是這種感覺，阮六個人就按呢約定一件代誌、、、、、、。
日子一工一工過，六個人作伙的時間愈來愈少，六個人散步的時間愈來愈少，六個人行銀河的時間嘛漸漸無、、、、、、；就按呢，四冬過矣，無人完成那個約束，分別的日子嘛來矣。
後一擺行銀河會是什麼時陣？後一擺咱六個人作伙行銀河閣是什麼時陣？後一擺看著你會是啥物時陣，我毋知影！阿咱的約定，恁甘猶閣會記得？
修辭:擬人.感嘆.設問
留言列表
