Hongtin Tsok-gia̍p bāng

將對方囥佇心內

    有一隻蛇伊的名叫做小明，伊普通時較安靜，無啥愛講話。伊有幾个仔朋友，雖講是朋友，毋過感情嘛無真深，見若做伙開講的時陣，小明攏是講無幾句就恬去，無像別人按呢遐有話講，小明家己嘛感覺足奇怪，是按怎無法度像別人按呢講甲遐興，伊想來想去抑是無法度理解。

    有一工，小明的朋友烏貓來共伊haiⁿ講:「小明啊，我身體啥爽快呢，人真艱苦」，小明應烏貓講:「喔!按呢喔!所以咧?身體無爽快毋去chhōe醫生，chhōe我有效呢?」小明講煞了後，烏貓就恬恬仔離開。

    過幾工了後，小明發現講烏貓攏無閣來chhōe伊開講，分享心事，伊感覺足奇怪，伊就罔行罔想，欲去chhōe烏貓，佇路途中伊看著烏貓佮狗仔兄佇咧開講，伊就bih邊仔聽in兩个講話，狗仔兄對烏貓講:「你看起來ná-ê無啥精神?是按怎?」烏貓就講:「我近來身體啥爽快」狗仔兄講:「啊，有按怎無?會真艱苦無?有去予醫生看無?毋通去予傷thiám著，愛加歇睏」烏貓講:「多謝你的關心，感恩，我會好好照顧家己。」

    小明聽了in的對話了後，伊發現講，別人佮伊講話的時陣，伊的反應攏予人感覺像去予蛇咬著仝款，遐爾啊疼，啊若是佮狗仔兄講話的人感覺就親像食糖仔仝款，遐爾啊甘甜，因為狗仔兄將別人囥佇心內，將別人的痛苦、心事當做是家己的代誌，去體會別人的感受，所以予人感覺足甘心。