Hongtin Tsok-gia̍p bāng

《樹》

『哇！足懸个！』

我袂曉講話，我只是惦惦khiā佇遐，看來來去去的人、車，我拄到的人比你食過的鹽閣卡濟，毋同款的，懸、矮、瘦、puî的男男女女。

『生做遮懸，大概幾歲矣？』

『毋知影是若久以前就有的，甘是以前就佇在遮？』

『看！閣有人佇遐放閃光……真正是……』

我的年歲有若大，已經是無法度考證真久以前的代誌矣，無人知影，我嘛袂曉講，大概就愛共迄寡舊相片pínn出來才會當揣到我的身影，連我的名字嘛無人知影，毋擱無要緊，因為逐家攏已經慣習我的存在，看我khiā佇咧遐，化作顧門的警衛，惦惦保護著這的所在，惦惦幫遐的情侶tsah別人毋親切的視線。

『足熱个！去樹跤避一个啦！』

『落雨矣，緊走！』

『干若袂開花neh……毋過嘛真好看！』

『嗯，有一種嶙峋的感覺！』

『寶貝，我愛你……』

『討厭，你足不羞鬼的neh……』

『X！所有的衰事攏發生佇我身上矣……』

『為啥物我就是做袂到……』

毋管天氣好nái，我攏袂離開我的位置，真負責的共本分內的代誌做予好，屹立不搖，像神靈、像阿兵哥、像父親、像愛人，樸實閣恬靜，簡單的色水，無需要其他的色水來襯脫我的氣質，只要盡所有的氣力往天頂伸直，展開胸坎共這片風景攬牢牢，用所有的枝葉安慰受傷的人的心靈，聽眾人講話，酸甜苦澀，攏總接受。

『Hello！我來矣！』

『再會，我來去矣！』

我看著恁大漢，當初的青澀佮不受教，這馬的成功佮打拚，我攏看在眼內，經過時代轉變、人事變遷，記憶了真濟故事，有一工，恁離開了後，嘛會成為我故事內底的角色！

 

使用修辭：擬人、引用、排比、譬喻