Hongtin Tsok-gia̍p bāng

     前幾日，佇一个安靜ê半暝，有一个人目睭一直向電腦睨，伊真好玄，佇這馬上時行的FB頂頭咧走揣，走揣伊過去ê往事。「XXX」共揤入去，「XXX」、「XXX」………，連紲一直揤，一直揣某某人ê名。

       這个人有淡薄仔奇怪，嘛小可仔變態，講佇網路頂懸烏白揣別人ê名，毋知是欲創啥貨？後來有人問伊是佇創啥物，伊只是恬恬無講啥，閣叫共問事ê人莫共攪擾。問事彼人就乖乖仔轉去家己ê位坐。

    這个人嘛真無禮貌，共人講一下是有啥物代？佇遐假鬼假怪。是講人嘛有家己ê隱私，總袂使人無想欲講，硬欲叫人講。無偌久，彼个怪奇兼無禮貌ê人雄雄對彼个予伊趕轉去坐ê人講話。

    伊問伊講：「你敢會感覺我真奇怪？」坐佇邊仔彼个人著講：「啥物代誌奇怪--ê？」in就佇遐講講講。原來，彼个一直睨電腦ê人佇揣伊較早ê同窗，只是伊會骨力去揣同窗ê FB ê理由實在是真好笑。

    伊講因為伊讀幼稚園ê時陣，伊有一个同窗偷提伊ê物件，而且伊無認錯，閣共老師講白賊，害伊ê物件冤枉予人偷提去。直到這馬伊猶閣記佇心肝內，連彼个人ê名伊猶閣會記得。

    坐佇伊隔壁ê朋友聽了實在是毋知欲笑猶是欲哭，伊感覺伊真幼稚，毋過嘛真佩服伊ê記持真好，代誌攏過遐久矣，猶閣結踮心頭，希望伊冗早共這無好ê回憶放袂記得較好，一方面伊又閣驚彼个記持真好ê朋友會袂共伊放袂記。

    每一个人ê成長過程攏無仝，總是歹ê過去攏會予人記持深刻，印象特別深，想欲放袂記得煞放袂掉，顛倒是好ê代誌定定會予人放袂記得，人ê記持有影是趣味又閣怪奇！