Hongtin Tsok-gia̍p bāng

雞蛋花—尤思又

啊﹗南方姊姊用伊溫柔的雙手搖醒我，我tshun-lûn一下，馬上用尚熱情的笑容迎接這个屬於我的熱天。逐家好，我是尚古錐擱有氣質的雞蛋花。佇這个尚kài有活力的熱人，我尚愛企佇宿舍的頭前等待趣味的代誌發生。

來矣﹗來矣﹗一陣囡仔走過來，圍佇我的身軀邊，囡仔嬰將我khioh起來，做成花khoo戴佇頭殼頂，in認真串花的表情，以及天真的笑容，乎我看著生命的活力，因此我更加用盡全力，搖動我的身軀，用我的花蕊帶予in滿滿的快樂。

天色漸漸變暗，路燈照佇我的身，予我散發出一種幽暗的媠，一對一對的情人尚佮意坐佇我的身軀邊談戀愛，有的查甫囡仔將我當作禮物，送予查某囡仔；有的查甫囡仔將我插佇查某囡仔的耳仔頂，來增加查某囡仔的媠；有的有的查甫囡仔將我排成一个愛心，對查甫囡仔講出心內的情意，佇這浪漫的暗暝，我變成愛人的媒人，用我清芳的芳味kah美麗的花蕊，促成一tsân擱一tsân的美麗愛情故事。

這工，我聽到遠遠的所在傳來驪歌的歌聲，沒毋著，這陣ka我鬥陣四年的學生仔tio̍h欲畢業矣，歌聲聽起來有淡kua仔悲傷，我心內充滿著毋甘，我將我珍貴的花蕊ia̍h佇校園內，當作送予in的祝福，祝in鵬程萬里，就像我共款，毋驚風雨，永遠展開我熱情的笑容。

我是雞蛋花，尚樂觀熱情的雞蛋花，我的任務是用我尚驕傲的花蕊帶予每一个人滿滿的快樂。請會記得，當你後一擺看著我的時，愛會記得將我khioh起來，鼻鼻--eh,你著會得到無限的的快樂。

修辭:擬人、轉化、類疊、譬喻