Hongtin Tsok-gia̍p bāng

自八點開門到十點下班，無知愛閣接待幾个人客，  

今旦日嘛無知會拄著啥mih款个人？  

我个人生就按呢一工一工過去，我个體力嘛一工比一工卡毋好......

佇圖書館趁食已經兩年三個月，今旦日是第七百九十二工，佮平常無啥無款，我个角色早著注定我干單會使恬恬仔等待，等待需要我个人。我个空課有時是門前清清，無啥人客；有時是鬧熱滾滾，袂赴應付，這兩款攏是我个生活。

無人个時陣，我著會使無顧慮个做我个眠夢，夢見我徛佇圖書館門口拄行入來；夢見我坐佇膨椅頂峘看雜誌；夢見我跍佇冊櫥邊揣一本想欲看个冊，我有跤有手，會凍自由自在个活動，是遐爾仔逍遙、遐爾仔khùiⁿ-u̍ah!抑毋過一切攏是夢、攏是空想，人客一來，鳥鼠一動，我著愛轉來現實个生活，我干單是一个提供服務个物件，自由个干單是我个靈魂，毋包括我个身體。

人濟个時陣，人客是一个接過一个，有人透過我將報告印出來；有人透過我傳送愛个情批；有人需要我个幫助，將講袂說个話語化作文字po起去網誌頂峘，解脫滿腹个痛苦、悲傷、憂愁；有人利用我下載奇奇怪怪个檔案，害我中毒破病艱苦，我替所in所做个一切，無人共我謝過多謝，無人感激我。我!我!著是遐爾仔悲哀，恬恬仔認命塊做，有時陣嘛閣愛忍受無公平个批評……

我毋感閣向望有一工我个伊會出現著我个面頭前，講伊願意真心對待我一世人、願意替我贖身，我抑是看清現實，共家己講：「汝mài閣戇啊!會永遠陪伴佇汝个身邊个，著干單迄隻佮汝平戇鳥鼠佮伊个睡板耳耳。」 

 修辭：映襯、引用、呼告、類疊