Hongtin Tsok-gia̍p bāng

    今年的「歌song人文唱歌比賽」真正是我人生中的重要一站。因為舊年參加無得獎所以足濟人攏掠準我今年會毋敢閣報名，毋過，我鼓勵家己！就算講無得名嘛無要緊，會當有機會上台訓練家己的台風、勇氣，是足難得的機會！所以一定愛好好矣把握！今年，我無予舊年的失敗打敗！我又閣報名囉！

    雖然講已經有過上台的經驗，毋過，彼種緊張感有影無遐呢矣好消化！本底就無啥物膽的我，猶袂上台就緊張甲咇咇掣！來現場陪伴我的朋友攏一直共我安慰，希望會當減輕我的緊張感，嘛一直共我講我唱了有偌好，所以莫緊張，發揮平常時的實力就好矣！雖然遮的話我嘛攏知，毋過，猶原是足緊張！

    奇妙的代誌來矣！欲輪到我的時陣，坐佇幕後，我猶是誠緊張，毋過，等到我徛這台頂，看著支持我的大家攏咧對我笑，所有的緊張感攏消失無去矣！順順利利共我的歌唱煞，會當攏無袂記得歌詞，嘛無啥物走音的唱了，我已經足滿足矣！我真正足慶幸有一大陣支持我的好朋友陪伴我！予我力量！

    其實咧公布名次的時陣，第二、三名攏毋是我，我心內就想講按呢應該是無矣，真正想袂到，最後一个名竟然是叫我的名！「十六號，曾怡寧」！唱名了我聽著全場的朋友為我歡呼，一時間我閣猶袂反應過來，一直到魏院長共我講「你是第一名，恭喜你！」我才真正意識到我誠實挈著第一名矣！

    這个第一名，真正毋是我家己得著的！無我的朋友一直共我安搭，規場攏陪伴我，就算講枵甲咇咇掣，嘛無走出去食物件，一直挺我到底！無遮的朋友，這个第一名真正袂是我的！有遐呢濟真心的朋友，才是我上大的收穫！聽in講in有偌替我歡喜，偌呢矣激動！心內的感動佮感恩才是我上愛珍惜的寶貝！