close
頂禮拜我轉去厝裡做民間文學的期末報告，我錄了真濟的民間故事，嘛佮足濟人翕相做紀念。
這个報告我已經連紲做兩禮拜啊！猶未開始進行報告的時，想講這袂足困難矣，較慢才做無要緊，結果開始做了後才知影這實在是無簡單！！好佳哉我有冗早先準備。這个報告困難的所在是，伊毋但愛揣著會曉講、願意講故事的老大人，閣愛先聽看覓in欲講的故事是毋是有符合老師欲挃的內容，上重要的是，閣愛參無熟似的老大人開講、共in訪問，問in是毋是願意分享in所聽過的故事予我聽，閣有等等老師所欲的問題。雖然過程總是有碰壁的時，毋過這嘛予我學著欲按怎佮毋捌的序大人猶是大人講話、開講，嘛予我練習著按怎訪問別人。後禮拜一閣愛去訪問阮遐的區長，真正是足緊張的啦！希望我會使較早完成這个報告，按呢才會使好好仔專心準備其他的期末考！
全站熱搜
留言列表
