阮這班
阮一班，無先生也無學生，因為阮這班，是一個歌仔戲班。
無毋錯，著是台中教育大學台灣戲曲社這個囡仔戲班，回憶當初時，眾人辛辛苦苦整班起來，到即麻也有欲兩冬阿，定定攏講：「父母無聲勢，才會予囝去做戲。」雖然做戲真辛苦，毋閣怹確實是尚有台灣味的藝術家，怹努力、扑拚，親像永遠唱袂完的七字仔、都馬、雜唸仔，一葩閣一葩，一句閣一句，唸袂煞…。
「今仔日閣愛排一擺西湖借傘，為汝下山開始。」我對學妹按尼講。
今仔日又閣是假日時仔，別人佇咧歇睏，阮閣佇咧學校排戲，到底是為著啥乜，我也無知影，可能是為著一款興趣佮感動吧？
「奴家白素貞，初初下山而來是為那宿世翁某之緣。」
「姊姊，若按尼咱著下山來去遊玩山景，一路走揣許相公阿！」
兩個學妹著佇咧舞台頂，照我安排的跤步手路佇咧做動作，定定佇咧想，我是做小生的角siau3，為啥會知影做小旦愛按怎搬，其實，做小旦的功夫，愛比做小生的在，每一個跤步手路攏咧出力，看起來真優美的身段，其實攏是出力kik出來的，無怪人攏講，做戲無輕鬆，到老阿，攏麻歸身軀害了了。
「學長，汝出場先愛予汝一個四主頭亦是緊戰出台？」學妹問我。
「攏好啦，看頭手的按怎拍著按怎做，該落歌著叫介伊著會知。」
「毋閣….」
「習慣著好，以後攏愛按尼，試看覓阿！」
也因為這個國民黨飼的台中教育大學，對歌仔戲社真排斥，予阮遇到「食娘心肝血，毋知父母恩。」的頂司，予阮社團真正活了有點淡薄仔艱苦，毋閣有老爺的庇佑，我想信一定會真成功，雖然我也投入真儕心血，也家己hap遐的物件，真正開袂少錢，毋閣這算是留予我的青春記憶，予我一段青春的回憶。
「阿汝物件買買遮儕是欲創啥？」阮阿母問我。
「無管按怎，這是一款紀念，一款青春歲月的紀念，紀念我的20歲，我的青春少年夢。」
修辭:譬喻、引用、排比
留言列表
