我有真儕真儕無共款的外型,
有圓的、有三角形的、mā有四四角角的,
我著是逐工透早lóng會kā人叫醒的「叫鐘仔」。
講著我逐工的khang-khuè,
著是愛tī主人伊所設定的時間來kā伊叫hōo tsing-sîn,
猶毋koh,
有時陣,主人若是thiám kah睏過頭的時,
我著無法度準時tī主人beh愛的時間來將in叫醒,
若按呢leh,我有時著會發生真不幸的代誌,
假使是tú著卡理性的人,伊可能是會怨嘆家治,講:
「是我家治無照時間起床,後擺著愛改進。」
猶毋koh,若是tú著性地khah bái的人,
伊可能著會tshò幹譙講:
「Kán! Siáⁿ-mi̍h 破時鐘,竟然無kā我叫hōo tsing-sîn!」
煞落著將我摔tiàm塗跤,害我摔kah kui身烏青,
有時可能koh會粉身碎骨,無法度繼續來完成我的使命。
雖然講,我的khang-khuè看起來好親像真危險,
毋知tang時會hông結束tàn掉,
毋koh,
對我家治這個khang-khuè,
我是真正足kah-ì的。
因為我知影,
會使用著我的人,lóng是有需要,tsiah會來做設定的安排,
Tse hōo我感受著我家治身軀頂的使命感,
會hōo我有kap別人無共款的存在感受,
Mā因為àn-ne,
我才會tsiah-nih愛我的khang-khuè!
Tī tsia,
我mā有幾句話想beh共使用著我的人來講:
「雖然我真kah-ì替人服務,
猶毋koh,我mā是有意識存在的一個性命體,
千萬tio̍h愛好好仔來kā阮使用,
M̄-thang因為一時的憤怒,
Tio̍h來kā阮摔摔hōo hāi,
可能恁àn-ne做會感受到一時的爽快,
猶毋koh,結束了後恁tio̍h-ē後悔家治的莽撞,
Koh khai一筆錢買一個新的tńg來用。
所以,tī tsia我希望逐家會使對阮khah好心leh,
愛知影阮是真認真來做tsit項khang-khuè,
絕對會去完成恁hōo阮的khang-khuè,
所以,
請恁好好仔kā阮愛護,lóo-la̍t!」
留言列表