Hongtin Tsok-gia̍p bāng

 你我熟識將近欲4冬，自大學一年阿kau3即馬，咱兩个逐工攏黏相偎，逐工你攏會載我去tshit tho5，載我去學校，載我去約會，載我去坐車，載我去家教，載我去真儕真儕个所在，只要有你佇咧，我就有滿足的安全感，所以我實在真愛--你。

我kap你的熟識是透過親戚的介紹，考著大學彼年，我位台北來到台中讀冊，真歡喜彼時陣會使kap你做伙來台中生活，你實在嘛是真死忠，閣對我真好，願意來台中陪我，予我一咧人佇台中秣驚惶，這一切攏是因為有你，你甘知？

但是，感情閣卡好，嘛是有可能去予有心人拆散…

彼擺，汝載我卜返去厝--lih，閣一uat著卜到厝矣，煞去予一咧mok 壁鬼共我撞--著，咱兩个攏受著真嚴重个傷，你為著保護我，家治个身軀攏liu皮阿，尾仔阮同齊去病院，我實在是真毋甘你受傷，因為咱逗陣歸仔東，我煞毋知你上驚我煩惱，所以，著算講痛甲欲死嘛秣講秣ai ，實在是足感心，閣卡予我感覺對你真歹勢。

後--來，代誌過去矣，歹人抓著矣，經過這幾冬，咱嘛攏擱加大漢矣，雖然捌痛過，但是遐个總是咱共同个回憶，有甜有苦，有歡喜有悲傷，這一切，攏是咱作夥行過个痕，毋管安怎，我一世人攏無可能會放忘記。


多謝這四年有你个陪伴，是你予我个人生閣卡豐沛，閣卡彩色，希望未來个路，咱會使閣繼續行！

我愛--你，我上親愛个oo too bai2。